Aruba Wastewater Sustainable Solutions (AWSS), e entidad di gobierno cu ta responsabel pa maneho di awa sushi, ta pasando den un transicion significante mientras e ta traha pa modernisa infrastructura, fortalece gobernacion, y mehora rindimento ambiental.

Esaki tabata bisto for di un presentacion cu a tuma lugar durante un reunion publico den Parlamento di Aruba durante cual minister di Husticia, Integracion, Transporte Publico y Energia, Arthur Dowers, a duna un splicacion y contesta preguntanan pa loke ta trata e situacion di AWSS.

Desde 1 di juli 2024, AWSS a tuma over formalmente e activonan clave di awa sushi, incluyendo e red di awa di rioolering di e isla, tres planta di tratamento di awa di sushi, y e facilidad di incinerator, marcando un cambio grandi den e maneho di e sistemanan di saneamento di Aruba.

E activonan traspasa ta inclui plantanan di tratamento situa na Bubali, Parkietenbos, y Zeewijk, hunto cu e red mas amplio di awa di riool y operacionnan di incineracion. E facilidadnan aki ta varia hopi den edad y capacidad. Bubali, e planta di mas bieu construu na 1972, tin un capacidad di diseño di 4.500 meter cubico pa dia, mientras cu Parkietenbos, construi na 2007, tin un capacidad mas chikito di 1.500 meter cubico pa dia. Zeewijk, construi na 2008, ta diseña pa maneha te cu 5.000 meter cubico diariamente. E instalacion di incinerator, cu a ser encarga na 2020, tin un capacidad di procesamento di aproximadamente un ton pa ora.

Segun e presentacion e rindimento operacional a mehora den e ultimo lunanan. Cifranan actual ta indica cu Bubali 65%-70%, Zeewijk ta na alrededor di 66% di capacidad, mientras cu Parkietenbos a yega mas o menos 90%. E incinerator, sinembargo, ta sigui opera na alrededor di 25% di capacidad, reflehando retonan operacional y logistico continuo.

A pesar di e mehoracionnan aki, un evaluacion recien ta subraya un rango di debilidadnan sistematico dentro di AWSS. E evaluacion a analisa structuranan di gobernacion, planificacion strategico, maneho financiero, recursonan humano, sistemanan di IT, practicanan di adkisicion, y cumplimento cu normanan di gobernacion corporativo. E resultadonan ta mustra riba buraconan den cuadro di politica, planificacion strategico insuficiente, y debilidadnan den procesonan di presupuesto.

Un di e preocupacionnan mas significante ta e falta di practicanan di gobernacion incorpora. Mientras cu cuadro ta existi riba papel, nan no ta ser aplica consistentemente den operacionnan diario, loke ta conduci na buraconan den supervision y responsabilidad. E ausencia di mecanismonan di audit interno, proteccion di denunciante, y sistemanan di cumplimento etico ta aumenta mas ainda e riesgonan operacional.

Pa loke ta trata maneho financiero, esaki tambe a presenta retonan. Segun e presentacion, AWSS actualmente falta procesonan di presupuesto formalisa, proyeccionnan financiero di varios aña, y controlnan interno documenta. E situacion aki ta complica monitoreo di gastonan y ta aumenta e riesgo di ineficiencianan. E organisacion tambe ta depende hopi di un solo fuente di entrada, e tarifa di sostenibilidad di turismo, loke ta haci’e vulnerabel pa fluctuacionnan den e sector di turismo.

Maneho di recurso humano (HR) ta un otro area cu ta rekeri atencion. Tanto AWSS como entidadnan relaciona ta enfrenta un scarsedad di politicanan formal di recurso humano, incluyendo structuranan di salario y planificacion di sucesion. Esaki ta lanta preocupacion tocante sostenibilidad di forsa laboral a largo plaso. Adicionalmente, e proporcionnan di personal ta indica ineficiencianan, cu un proporcion relativamente abao di personal di sosten compara cu personal operacional.

Den e area di tecnologia di informacion (IT), e evaluacion a haya cu sistemanan tin falta di gobernacion adecua, strategianan di seguridad cibernetico y documentacion. Esaki ta aumenta e riesgo di fayonan di sistema, violacion di dato, y tempo di inactividad operacional. E dependencia riba procesonan manual ta enfatisa mas ainda e necesidad pa modernisacion digital. Segun e presentacion, ya ta implemando strategianan pa seguridad cibernetico.

Vulnerabilidadnan operacional ta extende mas leu cu sistemanan interno. E cadena di transporte di awa di sushi actualmente ta sufri di un supervision limita, loke ta lanta preocupacion tocante dumping ilegal y su impacto riba medio ambiente. Transparencia pa clientenan cu ta paga tambe ta limita, y tin un falta di datonan operacional confiabel pa sostene planificacion y optimalisacion. Aglomeracion di trafico y rutanan ineficiente di trucknan ta agrega na e retonan logistico.

E facilidad di incinerator ta presenta un imagen mixto. Mientras cu a implementa medidanan strategico pa mehora cumplimento cu normanan di emision y amplia capacidad di procesamento, e facilidad ta sigui enfrenta retonan relaciona cu almacenamento di desperdicio. Aunke desperdicio medico acumula a ser procesa, almacenamento pafo di desperdicio medico y di sludge ta keda un preocupacion debi na riesgonan potencial pa salud y medio ambiente. E peticion di permiso di e facilidad, entrega na september 2024, ta bao di revision di gobierno ainda.

Como contesta riba e retonan aki, AWSS a delinea un serie di areanan di enfoke dirigi riba mehoracion di rindimento y sostenibilidad. Esakinan ta inclui fortalece maneho di activo a traves di audit y programanan di rehabilitacion, mehora infrastructura den tur planta di tratamento, y mehora calidad di reuso di awa. Esfuersonan tambe ta andando pa mehora structuranan organisatorio door di desaroya politica, procedura y plannan di continuidad di negoshi, y tambe inverti den training y desaroyo di personal.

Maneho di medio ambiente ta un prioridad clave. Plannan ta inclui conduci evaluacionnan di impacto ambiental pa tur planta y expansion di programanan di monitoreo pa emision. AWSS tambe ta trahando pa mehora calidad di emision a traves di aumento di muestra, medidanan di control di calidad, y acuerdonan potencial di nivel di servicio cu laboratorionan di tercer parti.

Mehoracionnan di infrastructura ta extende te na e red di awa di riool y ‘lift stations’. Inspeccionnan continuo tin como meta pa traha un mapa y evalua e liñanan y conexionnan existente, mientras cu ta identifica areanan critico pa reparacion, expansion of mudansa. E colaboracion cu e DOW ta enfoca riba separacion di sistemanan di awa di yobida y riool, un movemento cu ta spera di reduci sobrecarga di sistema y mehora eficiencia. Plannan tambe ta na vigor pa mehora y automatisa 19 lift station y conduci estudionan hidraulico pa optimalisa e rindimento di e red.

Un iniciativa strategico mas amplio, conoci como e “Integrated Wastewater Resource Plan”(Plan di Recurso di Awa Sushi Integral), ta ser desaroya pa guia tumamento di decision a largo plaso. E plan aki tin como meta pa establece un roadmap integral pa tratamento di awa sushi y desaroyo di infrastructura den henter Aruba. E ta inclui reevalua plannan existente a largo plaso, realisa analisis di scenario, y identifica oportunidadnan pa genere fluhonan di entrada nobo, particularmente a traves di reuso di awa.

Paralelo tambe e proyecto CleanFlow Aruba ta introduci un enfoke zonal pa maneho di awa sushi. Door di dividi e isla den tres zona operacional, e iniciativa ta busca pa reduci aglomeracion di trafico, baha emision, y mehora supervision. E tin como meta tambe pa atende cu practicanan di dumping ilegal y crea un sistema mas structura y transparente pa recohe y transporta awa sushi.

Varios proyecto ta andando of planea caba. Esakinan ta inclui expansion di capacidad di kimamento, renobacion di facilidadnan na Parkietenbos, y implementacion di programanan di operacion y mantencion mehora. Iniciativanan adicional ta enfoca riba mehoracion di normanan di salud y seguridad, desaroya acuerdonan di nivel di servicio cu partnernan manera Serlimar, y reorganisa operacionnan di dump. Tin tambe plannan pa expande servicio pa maneha un rango mas amplio di fluho di desperdicio, incluyendo sludge, desperdicio medico, cadaver di bestia y productonan confisca.

Mientras cu e esfuersonan ta señala un direccion cla pa modernisacion y mehoracion di gobernacion, e evaluacion ta conclui cu mester di intervenshon urgente na nivel structural. Recomendacionnan clave ta enfatisa e importancia di cuadro di gobernacion mas fuerte, definicionnan di rol mas cla, aumento di transparencia financiero, y e establecimento di controlnan interno robusto.

Segun cu AWSS ta sigui evoluciona, su habilidad pa atende e retonan sistemico aki lo ta critico pa garantisa maneho confiabel di awa sushi y proteccion di medio ambiente pa Aruba. Ta anticipa cu e proximo añanan lo ta un periodo decisivo, ya cu e organisacion ta balansa demandanan operacional inmediato cu strategico riba termino largo.