Ayera a trata caso tocante acceso na kiezersregister; Corte lo duna veredicto mañan

Recientemente, partido AVP a entama un caso contra gobierno, despues cu gobierno a tuma decision cu no ta bay comparti e kiezersregister, esta e registro di votador, na e partidonan politico mas. Ayera, e caso a wordo trata den corte, maske hues no a duna veredicto ainda.

Ponencia di partido AVP, representa pa abogado mr. Johan Sjiem Fat, ta cu gobierno no tabatin derecho di rechasa nan solicitud pa un copia di e registro di votadornan mirando cu ley ta prescribi cu nan por hay’e. Segun Sjiem Fat, ta un tradicion di 70 aña cu ta duna e registro di votadornan na e partidonan, y awo gobierno kier kibra esaki, segun AVP, pa comete fraude electoral.

Gobierno inicialmente, respondiendo na comentarionan expresa den medionan di comunicacion, a tuma e decision di no haci entrega di e registro di votadornan pa asina protege e privacidad di e ciudadanonan, ya cu e lista en cuestion ta inclui informacion priva personal di cada ciudadano.

Pero segun partido AVP, duna e registro na e partidonan no ta viola e privacidad di e ciudadano. Lider di Partido AVP, Mike Eman a bisa cu e unico motibo pa cual a pidi e registro di votador ta pa por controla si cada persona cu a vota tin derecho di vota, y si e persona cu ta registra pa vota ta esun cu a registra. Sin e registro di votador ta imposibel pa controla esaki, dunando segun nan espacio pa fraude electoral. Ta pa e motibo aki cu a entama e caso.

Ademas, abogado di AVP a argumenta cu maske intencion ta pa cambia e ley cu ta permiti haci entrega di e registro di votacion na e partidonan, y anticipando esaki a actua rechasando e solicitud, esaki no ta legalmente corecto.

Director di Censo, Sharine Luydens a duna comentario despues di e audiencia den corte, y den esaki el a bisa cu e ley en cuestion ta ‘anticua’ y no tin un motibo pa ta valido mas. Segun Luydens, tempo cu a bin cu e ley no tabatin forma corecto di identificacion sino mester a controla cu e persona cu ta presenta realmente ta esun den e registro. Pero Luydens a indica cu awendia esey no ta e caso, y tin mecanismonan na luga cu ta haci e control ey posibel sin mester pone den riesgo e privacidad di e ciudadanonan.

Di su banda, presidente di Conseho Electoral, Glenn Thode a destaca e diferencia entre un lista di papel y uno digital, indicando cu e documento digital ta presta su mes pa diferente analisis di data, cu por perhudica e ciudadanonan. Conseho Electoral ta insisti riba e punto cu no tin ningun necesidad pa e partidonan politico cu ta bay participa den eleccion diabierna awo ricibi un copia di e registro di votador.

E veredicto di corte mañan lo dicidi si mester haci entrega di e registro di votador na cualkier partido cu solicita esaki, of ta mantene e posicion di Conseho Electoral y opta pa protege privacidad di e ciudadanonan.