Aymar Middendorp, conoci manera Aymar Torres, ta un di e artistanan local cu a participa den The Voice of Holland conhuntamente cu Jeremy Garcia. Torres ta conta su experiencia y con su carera musical a cuminsa.

Middendorp a conta cu el a cuminsa den coro cu 6 aña, cu Maybelline Arends. Cu su 12 aña el a cuminsa canta, cu su amigonan den un band y toca e instrumento bass. Pa ora el a bira 16 aña di edad, el a cuminsa tuma cantamento na serio. Den famia e tin miembronan den musica, su tata y su dos ruman muhe.

El a dicidi di sigui studia na Hulanda, sinembargo, su obhetivo final tabata pa sigui cu musica. Ora el a yega Hulanda el a ‘bay full all out’, sinembargo el a dura un par di aña pa motibo cu e tabatin su estudio pa cumpli cune.

“Semper mi kier a caba mi otro studio prome, pasobra mi a pensa cu musica mi no lo por gana placa. Pero na final mi a haya oportunidad pa duna les di musica, anto eynan cos a cuminsa bay serio”, e ta expresa.

E pensamento cu musica e no lo por gana placa ta pasobra e kier a ‘play safe’, caminda e tabata tin su plan A y musica tabata su plan B. E ta bisa cu ta di lamenta cu el a haci esey pasobra el a tarda mas pa yega caminda e kier a yega. “Pero importante ta cu ma yega of mi ta bezig full time cu musica” y tambe duna les part-time.

Middendorp ta bisa cu e pensamento di miedo tin di haci cu cultura di awendia. Sea mayornan, docente cu ta bisa cierto cosnan. E ta haya cu hende mester curasha y motiva hubentud di awendia pa locual nan kier logra. “Bo por gana bo placa si bo dedica bo tempo na dje.”

E pasion di e persona ta bira trabou tempo completo. Den su caso, musica a bira su trabou. “Naturalmente na comienso bo no ta bay gana placa cune ,pero bo ta cuminsa un caminda. Pues mi traha na banda, diferente trabou prome cu mi a logra.”

Audicion pa The Voice of Holland.
Middendorp ta bisa cu el a haya un yamada pa participa. El a bisa no, pero su pareha a ‘bisa mi cu mi no tin nada di perde’ y ‘cu tur su rason’, e no tin nada di perde y lo tin un experiencia nobo.

Sinembargo esaki no ta prome biaha cu el a yega di audiciona. Na 2014 el a bay pero no sigui na Best singer & songwriters van Nederland riba television. Despues el a sali atrobe na The Voice of Holland, pero no a bay cu bon repertorio.

Pero esey no a desamina Middendorp, el a sigui su carera como musico. “Nan tin bo number, nan ta sigui wak con bo proceso ta bay y si nan tuma nota cu bo a bira miho ta tuma contacto cu bo.”

Un tip cu e ta duna ta cu si nan no tuma e persona e prome biaha, no ta nifica cu nan no ta bay sigui bo, pasobra net e momento ey, nan ta sigui e proceso di e persona.

Su experiencia den audicion.
Middendorp ta comparti cu e ta un persona espontaneo y gusta pone ambiente. E ta move hopi y gusta duna un show, e ta ‘un entertainer’. E gusta pone hende hari y ta contento. Pa e motibo aki el a duna un show asina durante su audicion.

“Mi no a bay cu expectativa pa keda aden, mi kier a djis participa y sali den television. Mi no a pensa cu tur cuatro hurado lo a bira. E tabata un shock pa mi caba cu un a bira, anto tabata great, claro semper mi a keda cu e concentracion. Pero tabata un sentimento tremendo”, e ta conta.

Pa Middendorp sigur ta un logro. Tambe segun su conocemento ta prome biaha cu dos Arubiano ta keda den e temporada. E ta splica cu un persona mester tin ‘the voice’, e bos cu mester ta apart y resalta, e ritmo y ‘claro bo mester ta bo mes’.

Kico mas por spera di Aymar Torres.
E ta bisa cu e ta keda sigui toca, dependiendo di estilo, su so of cu banda. Den e banda ta ‘puro Arubiano’ riba tur instrument. El a agrega tambe cu e tin su propio canticanan saliendo pronto, na Papiamento, Italiano, Frances, Spaño y Portugues. Den 5 idioma, e ta bisa e por canta Ingles cu Hulandes tambe, pero e kier ta diferente na tur otro persona na Hulanda.

Pa Middendorp e lo sigui toca den banda, weekend den festival of cierto evento. The Voice of Holland ta dun’e mas exposicion pa e publico, pero e lo sigui riba su caminda di musica.

Mensahe di Middendorp pa tur esunnan cu tin un soño den arte: “Si bo sa caba kico bo kier haci, djis bay p’e y no pensa di mas. No pensa placa, pensa riba bo pasion y train hopi pa locual bo gusta.”

Si kier sigui duna sosten na artista local por haya Aymar Middendorp riba Facebook y Instagram como Aymar Torres pa sigui su musica y update di su bida.

 

LEAVE A REPLY

Please enter your comment!
Please enter your name here