16dec, JM, HOH (3).jpg

ORANJESTAD – Ainda bacteria MRSA cu na Ingles ta nifica “Staphylococcus Aureus Methiciline Resistent”, no a wordo elimina totalmente fei hospital, ya cu e proceso aki no ta facil. Director di Horacio Oduber Hospital (HOH), sr. Ezzard Cilié a declara na Bon Dia Aruba cu cada bes cu e bacteria ta wordo detecta den hospital, nan ta “deal” cun’e. Sin embargo el a laga sa cu MRSA “ta algo cu bo no por elimina asina facil”. E ta prefera di bisa cu nan tin e bacteria controla den hospital, pero no ta cos cu bo ta bisa cu bo por elimina cien porciento, ya cu e no ta bay asina facil.

Factor di contaminacion  

Sr. Cilié a indica cu unabes cu nan ta elimina e bacteria aki  den hospital, nan ta haya pashentnan cu ta drenta y cu nan no sa cu tin e bacteria y cu ta contamina e hospital bek.  “E no ta algo cu bo por wak delanta”, el a bisa. Nan ta haci tur esfuerso pa controla e presencia di e bacteria aki den hospital. Si un persona ta wordo registra caba ora cu e ta drenta nan por sa si e tin e bacteria. Sino –segun sr. Cilié- nan ta bolbe confronta cu e presencia di e bacteria MRSA den hospital. Otro fenomeno cu el a denuncia cu ta pasa basta frecuente aworaki ta cu nos pashentnan ta bay afo y ora cu nan ta bin bek nan ta bin contamina. “P’esey e ta dificil pa bo elimina”, el a declara.   
MRSA 

Bon Dia Aruba a busca mas informacion tocante e bacteria aki. MRSA a wordo identifica pa prome biaha na añanan 60, y e tabata wordo haya mas tanto na hospitalnan y luganan di cuido di hende grandi. Esaki tabata debi cu nan tabata duna e hende antibiotico ora no mester y e pashentnan tabata bebe e antibiotico na un manera cu no mester a bebe. Na final di añanan 90 sorto nobo di MRSA a wordo identifica, e sorto nobo aki ta birando mas comun entre hende saludabel.  E bacteria por afecta diferente persona di dos manera: Colonisacion y infeccion. Ora un persona ta carga e bacteria den su cuero of nanishi, pero e no ta mustra señal of sintomanan di infeccion ta wordo papia cu e ta colonisa. Si un persona ta mustra señal di infeccion pa MRSA manera abceso, infeccion den un herida, neumonia, infeccionnan respiratorio, infeccionnan di sanger den sushi  y den orina ta wordo considera como un persona infecta. 
MRSA ta un infeccion serio cu por pone bida di hende na peliger si no ta wordo trata di manera adecuado. 

Con bo ta evita contagia 

E manera mas eficaz pa evita cu bo ta wordo contagia ta  bon higiena di bo mannan, esta laba nan bon cu awa y habon pa minimo 20 seconde. Mester laba man prome y despues di a haya contacto cu un pashent. Entre otro medida tambe ta e uzo di ekipo di proteccion personal pa evita e contacto cu likidonan di curpa di otro persona. Mester uza handschoen ora di mishi cu e pashent. Mester benta e ekipo di proteccion personal afo despues cu a wordo uza y mester laba e man despues. Mester tin un programa di limpieza di medio ambiente tur dia, mester desinfecta e banda di cama, telefonnan y ekipo pa e adernan. 

 

 

LEAVE A REPLY

Please enter your comment!
Please enter your name here