Ex-Procurador General di Bahamas, Alfred Sears den un carta pa Prome Minister di e pais, Hubert Minnis a critica e forma ‘diferente, cu tardansa y cu discriminacion’ cu e cual e proceso di rescate di sobreviviente na Gran Bahama y islanan Abaco a tuma luga despues di e devastador paso di horcan Dorian.

“No tin husticia”, el a indica den e carta publica diasabra pasa, den e cual tambe a relata cu durante seis ora diahuebs pasa, el a purba di saca su famia ‘desesperadamente’ di Abaco, luga na unda el a aprecia e diferencia entre e atencion pa esunnan cu lo desea di sali. “Ta parce cu no tin husticia pa e hende mas vulnerabel na Bahamas”, el a agrega.

Ora cu ainda no a pasa ni un siman di e paso di e horcan Dorian, cu a causa un masivo destruccion, inundacionnan, y, te na e momento e fayecimento di 43 persona, e preocupacion mayor ta pa malesanan manera colera plama entre e poblacion, pa via di e insalubridad y awanan stanca den areanan afecta.

E cantidad di habitante na Gran Bahama ta 51.500 persona y na Gran Abaco ta 17.000.

Di otro banda, Sears a pidi urgentemente pa e ehecutivo di isla evacua e personanan gratis pa luganan sigur unda nan por ta consola y atendi.

Mientras tanto, Dorian a keda debilita na categoria uno den oranan di marduga di diabierna pasa ora el a acerca te North Carolina, na Merca pero diasabra a recupera na categoria dos mientras tabata yega na Canada.