Alto Comisionado di ONU pa Derecho Humano, dirigi pa Michelle Bachelet, a emiti ayera un informe nobo den cual e ta indica cu “ta parce cu na Venezuela e ehecucionnan extrahudicial ta continua” y ta mustra riba e cuerpo Forsanan di Accion Special (FAES) como responsabel, cu e apoyo di funcionarionan di e regimen di Nicolas Maduro.

Michelle Bachelet a bisa Conseho di Derecho Humano di ONU cu hunto cu e posibel ehecucionnan, su oficina a documenta caso di tortura di militar y otro persona deteni arbitrariamente, y a urgi gobierno di Presidente Nicolas Maduro pa castiga esunnan culpabel.

Bachelet, ken a emiti un informe na comienso di juli detayando relato tocante scuadronnan di morto dirigi pa FAES, segun e organisacion gubernamental Monitor di Victima cu a registra 57 caso di pre supuesto ehecucion cometi pa miembro di FAES na Caracas e luna ey. Ademas e ta agrega cu e Oficina di Bachelet “no a ricibi informacion di medida pa implementa e recomendacion di e informe (anterior) encuanto e disolucion di FAES y preveni mas posibel ehecucion extrahudicial. Al contrario, FAES a ricibi apoyo na e nivel mas halto di gobierno.”

Bachelet ta mustra preocupacion tambe pa e efecto cu e sancionnan Mericano tin riba e pais. A pesar di e excepcionnan cu a contempla den e ultimo sancionnan pa ayudo humanitario, e escrutinio estricto di sector financiero, e reduccion den entrada di gobierno y e caida den produccion di petroleo tin un impacto riba programanan social y riba poblacion en general. “Tur esaki ta contribui na un situacion humanitario mas grave y un exodo di persona Venezolano.

Tambe Bachelet ta referi na e menasanan expresa pa funcionarionan halto di e regimen contra algun entidad di sociedad civil cu a coopera cu Nacionnan Uni. “E represalianan pa a coopera cu Nacionnan Uni ta inaceptabel y mi ta urgi autoridadnan pa tuma medida di prevencion.”

 

LEAVE A REPLY

Please enter your comment!
Please enter your name here