(AP) – Alec Baldwin a bisa diabierna cu e asesinato di e cinematografo cu un arma di candela supuestamente no di berdad tabata un “accidente tragico” mientras autoridadnan ta investiga e tiro, cual tambe a herida e director.

Halyna Hutchins, e cinematografo encarga di graba “Rust,” y director Joel Souza a ser tira riba diahuebs den e desierto pafo di Santa Fe.

Un vocero di Baldwin a bisa cu un scopet cual tabatin bala blanco aden a fata. Un vocero di Santa Fe County Sheriff a bisa cu detectivenan ta investigando ki tipo di bala a dispara y con esaki a sosode. Ningun cargo inmediato a ser poni den contra di ningun persona.

E no tabata cla si Baldwin tabata actuando na e momento cu e scopet a los tiro, of cuanto bala a ser tira, y tin hopi tiki informacion tocante e arma.

“No tin palabra pa expresa mi shock y tristesa pa cu e accidente tragico cu a tuma e bida di Halyna Hutchins, un casa, un mama, y un colega hopi admira di nos. Mi ta cooperando completamente cu e polis y e investigacion,” Baldwin a skirbi riba e red social twitter. “Mi curason ta kibra pa su casa, nan yiu homber y tur persona cu tabata conoce y stima Halyna.”

Vocero di cuerpo policial Juan Rios a bisa cu e detectivenan tabata na e sitio di grabacion diabierna mainta buscando evidencia y informacion. Baldwin ta permiti di biaha, el a bisa.

“E ta un homber liber,” Rios a declara.

Imagennan di e actor di 63 aña di edad, conoci pa su rol den “30 Rock” y “The Hunt for Red October” y su impresion di president anterior Donald Trump riba “Saturday Night Live” a mustra su persona preocupa pafo di e oficina di polis riba diahuebs.

Scopetnan usa den grabacion di pelicula tin biaha ta arma real cu por tira sea bala di berdad of blanco, cual ta balanan cu ta produci un lus y zonido pero no tin material dañino. Sinembargo, te hasta bala blanco por produci gasnan cayente y papel of plastic di paden di e scopet por ta letal den proximidad cercano. Esaki a comproba di ta e caso den e morto di un actor den aña 1984.

Den otro accident cu a pasa durante grabacion den aña 1993, e actor Brandon Lee a fayece despues cu un bala a ser laga den un scopet pa grabacion, y tiramento similar a yega di sosode, cu armanan riba escenario cu tabatin bala di berdad aden.

Protocol di siguridad di arma di candela riba sitionan di grabacion na Merca a keda implementa desde e incidente aki, segun Steven Hall, un director veterano di fotografia na Britania. Pero el a bisa cu un di e posicionnan mas riesgoso cu tin ta tras di e camara, pa motibo cu e persona ta den e linea di tiro den e escenanan unda cu un actor ta aparece apuntando e scopet na e audiencia.

Hutchins, ken tabatin 42 aña di edad, a ser hiba un hospital pa medio di helicopter, unda cu a pronuncia su fayecimento. Souza, ken tin 48 aña di edad, a keda herida y a hiba su persona na un centro medico via ambulance.

Polis responde mas o menos 2or di atardi na e sitio di grabacion na Bnanza Creek Ranch despues di yamadanan na 911, describiendo cu un persona a ser tira na e sitio, Rios a bisa. E rancho aki a yega di ser usa pa varios pelicula, incluyendo esun reciente di Tom Hanks, “News of the World.”

 

LEAVE A REPLY

Please enter your comment!
Please enter your name here