(AP) – Oficialnan di Merca ta publicando advertencia nobo tocante China su ambicion den e area di inteligencia artificial y un rango amplio di tecnologia avansa cu eventualmente por otorga Beijing un bentaha militar decisivo y posibel dominacion den cuido di salud y otro sector esencial na Merca.

E advertencianan ta inclui un esfuerso renoba pa informa ehecutivonan di empresa, academia, y oficialnan di gobierno local y di estado tocante e riesgonan di acepta inversionnan Chino of experiencia Chino den industrianan clave, oficialnan na e National Counterintelligence and Security Center a bisa diahuebs. Mientras cu e centro no tin intencion te ainda di bisa oficialnan rechasa inversionnan Chino, e lo encurasha esfuersonan pa controla propiedad intelectual y implementa medidanan di siguridad.

Agencianan di siguridad nacional bao di President Joe Biden su administracion ta haciendo un esfuerso agresivo contra China, cual algun oficial a yama e menasa strategico mas grandi na Merca. E administracion Biden tambe a purba di alivia e tension cu Beijing cual a cuminsa desde Trump su administracion y purba yega na un acuerdo pa cu intercambio y cambio di clima.

Den varios ocasion Beijing a acusa Washington di instiga miedo tocante nan intencion y a ataca Merca pa nan comentario di China, incluyendo alegacionnan cu lidernan Chino a retene informacion critico tocante e pandemia di coronavirus.

Bao di President Xi Jinping, e gobierno Chino a bisa cu nan meta ta di crea tecnologia cu ta genera ganashi den robotica y otro areanan den varios plan conoci como “Made in China 2025.” E Departamento di Husticia den añanan reciente a ricibi hopi alegacion di robo di informacion sensitivo di parti di China, incluyendo investigacionnan tocante vacuna y tecnologia di vehiculonan autonomo.

E director actual di e centro di Counterintelligence Center, Michael Orlando, a conta reporteronan di un reunion riba diahuebs cu Merca “no por perde” contra di China den areanan hopi clave manera: inteligencia artificial, sistema autonomo, sistemanan di computer, semiconductornan y tecnologia biologico.

Orlando a nota cu e negoshinan Chino y academiconan ta pertenece na e partido comunista Chino y ta rekeri di sirbi e partido su interesnan.

“Aunke nos tin aña tras aña ta bisa esaki, hendenan no ta comprondiendo,” el a bisa.

Orlando a nenga di bisa si Merca lo mester implementa restriccionnan mas estricto of prohibicionnan riba inversion Chino den cierto sector, bisando cu su rol ta di no sugeri politica.

Pero e Counterintelligence Center tin reunionnan regular cu e industria priva y academia mientras cu nan ta reconoce cu industrianan y universidadnan te ainda lo kier busca studiante, experto y inversion di China, Orlando a bisa. E no lo nombra e companianan cu ken e centro a reuni.

E centro su oficial di Emerging and Disruptive Technology, Edward You, a nota e inversion di companianan Chino den Merca y Europa su biotecnologia y farmaceutico.

WuXi Biologics desde aña 2019 a construi un facilidad di fabricacion di vacuna na Irlandia, anuncia plan pa un facilidad di produccion na Massachusetts y a adkiri un planta Bayer na Alemania. Oficialnan riba diahuebs no a revela informacion tocante e adkisicionnan aki na Beijing su influencia pero a bisa cu nan ta parti di un plan mas amplio di companianan medico Chino.

Companianan Chino tambe a ofrece kit di test di COVID19 na Merca, ta cumpli cu e standard di privacidad federal y otro regulacionnan segun You.

China ya caba tin e acceso mas grandi na datonan medico di cualkier pais, You a sigui conta. Cu e coleccion di dato cu e tin y su avancenan den tecnologia, Beijing algun dia por bira dominante den cuido di salud, lagando Merca completamente dependiente di China, el a bisa.

“Si bo ta president Xi,” el a comenta, “esey ta e regalo cu ta keda regala bek.”

LEAVE A REPLY

Please enter your comment!
Please enter your name here