Banco Central moderadamente positivo


Banco Central a publica ayera su Economic Outlook pa aña 2018 y ta importante pa tuma bon nota di loke nan ta trece dilanti. Positivo ta cu ta mira un crecemento economico modera, di 0,3% real di GDP, aunke cu e driver grandi anticipa te comienso di e aña aki, e reapertura di e refineria lo keda loke e ta, un pregunta grandi. Mescos cu gobierno a anuncia pa loke ta presupuesto 2018, Banco Central no a ni preocupa pa traha un proyeccion cu y uno sin e impacto di e refineria. Esey ta parce nos e miho opcion tambe, pa e simpel motibo cu nos lo surpasa mita di aña facilmente, prome cu por tin un bista riba un cambio positivo na Venezuela. Y sin e cambio positivo ey, lo no bin cambio den posicion di gobierno Mericano pa cu Venezuela, y lo mantene e actual sancionnan contra e pais aki, loke tambe tin su efecto directo riba e inversionnan planea na San Nicolas.

Nos por corda cu recientemente nos prome minister a biaha pa Merca y a comunica cu autoridadnan concerni, y a haya, di loke nos por comprende di su declaracion, un contesta diplomatico, cu no ta priminti nada. Naturalmente nos tin persona, specialmente esunnan di e anterior gabinete, cu ta grita cu gobierno mester haci mas, y ta purba crea e imagen cu Citgo (cual di nan?) no tin nada di haci cu gobierno Venezolano y PDVSA, cu ta trata di bunita y solido inversion Mericano, pero e fli ey no ta subi. Nan por convence algun hende local, pero si bo no por convence gobierno Mericano, cu a pone como meta importante pa trece un cambio di gobierno na Venezuela, nan ta keda considera gobierno Venezolano y PDVSA pa loke nan ta: e beneficiarionan directo di cualkier inversion na Aruba. Es decir, e porta ey ta keda cera.

Esaki ta trece Banco Central riba un punto importante, y esey ta cu nan ta señala cu si no ta bin mas actividad economico nobo, banda di turismo y refineria, nos ta cuminsa haya problema pa cubri nos importacionnan cu loke nos ta gana anualmente na divisa. Esaki ta serio. Pasobra manera bisa mas biaha, nos ta papia pa decadanan caba tocante diversifica economia, pero e berdad ta cu si nos a haya un cen pa cada palabra expresa den e contexto aki, anto nos tabatin un balente fondo di inversion pa cuminsa cu esaki. E realidad ta otro y ta bira realmente urgente pa logra algo riba e tereno aki. Y pa esey nos lo mester haci algo diferente, pasobra manera sin duda nos tur a yega di tende e expresion, cu si bo ta keda haci mesun cos, y toch ta spera algo cambia, bo ta… wel, nos tur sa kico.

Kico anto nos por haci diferente? No tanto cos, ban cuminsa pa no crea expectativa cu no por cumpli despues. Un di e asuntonan cu nos mester atende en todo caso ta e gap enorme cu a crea den suministro di vivienda popular. Nos no mester di ripiti kico no a sucede den e añanan tras di nos, pero un bon programa di construccion di vivienda popular ta yuda crea empleo, y ademas ta crea algo cu ta necesario y cu ta paga su mes, excepto e parti cu socialmente lo mester di ayudo. Gobierno a anuncia caba cu ta bay construi 200 cas pa aña, loke ta aumenta e continuacion di empleo den construccion.

Seguidamente e famoso turismo medico, atrobe. Nos sa cu den circulonan di gobierno tambe ta vocifera deseo, pasobra plan nos no a mira ainda, pero aki ta necesario pa haci algun reflexion. Pakico ta pensa, atrobe, cu ta nos sector medico gubernamental, cu tin un problema grandi pa duna servicio adecua na nos ciudadanonan, ta bay duna servicio di calidad, cu ta bay competi cu e clinicanan di renombre den nos region. Ta bira tempo pa yega na comparti inversion cu clinicanan priva di reputacion den otro pais, cu a gana nan merito caba riba e tereno aki, manera e clinica di cardiologia na Bucaramanga, cu no solamente ta duna nos servicio, pero tin un bon nomber internacionalmente.

Banda di atende nan mes clientenan di exterior aki na Aruba, nan por duna e second opinion cu hopi di nos ciudadanonan ta bay busca den exterior, sigur ora nan mester warda tres o cuatro luna pa nan haya nan first opinion, mientras cu e persona no mester paga avion ni hotel. Miho laga e iniciativanan aki na sector priva, mientras cu gobierno cu urgencia cuminsa mehora e condicionnan den cual sector priva ta trahando, e famoso red tape cu no ta bira red carpet di nochi pa mainta sin cu algo move. Manera e ridiculez di servicio di Impuesto cu ta bisa bo paga online, pa despues bo bay para den fila atrobe pa bo haya un stempel, pasobra e parti ey nan no por drecha… Nos a keda realmente asombra con facil nos ta guli e tipo di insultonan aki di profesional cu ta supone di sa miho. Gobierno, cuminsa pone enfasis riba bo trabao y laga sector priva haci di nan.

You May Also Like

A lubida scandal na Setar caba?

Algun tempo pasa Aruba a haya un sacudi di prome orden. E caso di ...

editorial 2_36.jpg

Despues di Paris: ban traha!

Conta hende straño ta uno, traha na cas ta otro! Mundo henter a keda ...

Fondo monetario cu rapport balansa

Banda di elogio, ta sugeri mas medida Aruba a caba di haya e rapport ...

Caft a sali fuerte riba gobierno

Finalmente e colegio di supervision financiero CAFT a mustra di no ta kere tur ...

Segun noticia ta bay y bolbe

Den e pais aki, algo grave o fastioso ta sucede, Y Tur medio di ...

Pone un stop na importacion ilegal ta bon medida

E anuncio di cu porfin ta bay haci algo contra importacion di producto ilegal, ...