Banco Central di Aruba (BCA) ta publica un actualisacion di e ‘Economic Forecast Monitor’. E EFM aki ta duna un bista riba proyeccionnan economico, local y internacional, pa motibo di diferente institucion. Esaki ta segun e relato cu nos a ricibi di Banco central.

Durante e prome tres lunanan di 2018, e perspectiva riba e desaroyo economico internacional a bira mas optimista. Specialmente esun di 2018 riba crecemento di Producto Domestico Bruto (PDB) real den economianan avansa y paisnan Latino Americano a mehora. Consecuentemente, crecemento di PDB global pa 2018 ta actualmente premira na 3,6%, na luga di 3,5%.

E desaroyo aki ta principalmente causa door di expansion economico di e paisnan Asiatico grandi China y India(crecementonan anticipa di mas cu 6%). E economianan Latino Americano, cu excepcion di Venezuela, ta proyecta di presta bon cu crecemento di mas cu 2% similar na mayoria pais industrialisa. E estimacionnan di PDB real pa 2019 generalmente lo permanece mas of menos igual na e proyeccionnan di 2018 pa e paisnan Asiatico y e continente Latino Americano (cu excepcion di Venezuela), y un poco mas abou pa e economianan avansa.

E proyeccionnan revisa tambe ta mustra riba expectativanan di e mercado laboral mas optimista. Nivelnan di desempleo ta anticipa pa baha gradualmente, specialmente den e paisnan cu tin euro como nan moneday Brazil. Sinembargo, e tasa di desempleo den e zona di euro (8% pa 2019) ta keda halto, debi na e tasanan halto na Spaña, Portugal, y Italia.

E perspectiva di inflacion pa 2018 ta modera. E consenso general ta un inflacion global di 2,9%, un bahada di 1,0 punto di porcentahe compara cu 2017, parcialmente debi na subidanan den prijs mas abou den paisnan Latino Americano. Inflacion den Norte America y Europa ta permanece cerca di e tasa desea di 2%. Ta anticipa cu prijsnan mundial di petroleo (WTI) lo solamente subi gradualmente na un averahe di un poco menos cu US$60 den e proximo dos añanan. E prijs di oro riba e mercado mundial ta proyecta di keda net bou di US$ 1.300 durante e aña aki, subiendo gradualmente na US$ 1.350 den 2019 (grafiek). Proyeccion selecta di PDB y prijsnan di materia prima (2017-2019)
Indicador

2017

2018

2019
PDB real (porcentahe di crecemento)
Mundo

3,5

3,6

3,5
Merca

2,3

2,6

2,2
Zona euro

2,3

2,1

1,9
Hulanda

3,1

2,8

2,2
Venezuela

−10,1

−5,6

−2,2
China

6,9

6,3

6,1
Prijsnan di materia prima (averahe)
Prijs di petroleo (WTI, US$/baril)

51

57

58
Prijs di oro (US$/oz)

1.258

1.281

1.312
2017: data actualisa (excepto PDB Mundial y Venezuela); 2018-2019: proyeccion

E publicacion completo ta disponibel riba e pagina web di BCA (www.cbaruba.org).