Banco pa agricultura, seguro pa garantisa viabilidad di negoshi y institucionalisa relacionnan den mercado.

E severidad di e shock di COVID-19 a crea oportunidad pa reevalua strategia economico den forma cu no solamente ta maneha risico, pero cu por crea estimulo pa inverti den forma nobo pa crea trabounan sostenibel. Esaki ta locual Banco Mundial ta bisa den su conseho pa Aruba.

E trabounan aki lo por mehora e forma con pa sostene y hisa calidad di bida, medio ambiente y tambe entidad cultural nacional. E conseho ta titula ‘Building Resilience in Aruba’s Food Security During the Pandemic and Beyond’ (Traha riba resiliencia den Siguridad di Cuminda durante e Pandemia y Despues) ta un evaluacion rapido desaroya di e institucion mundial pa Gobierno, pa sostene su maneho post COVID-19 pa garantisa siguridad di cuminda.

E pandemia di COVID-19 a causa no solamente un crisis di salud, pero un crisis economico cu impacto serio riba siguridad di cuminda pa comunidad. No menos cu 80 porciento di tur hogar na Aruba a experiencia perdida di trabou of reduccion di salario. Y e produccion di cuminda local ta apenas un fraccion di tur locual Aruba mester importa. Pa e motibo aki, mester a busca un strategia pa evita cu Aruba bolbe experiencia cu crisis asina den futuro.

E raport di Banco Mundial a keda elabora despues di dialogonan y intercambio virtual cu un gran cantidad di institucion y individuonan na Aruba. E trabou ta parti di e ‘Technical Assistance Program for Disaster Risk Financing and Insurance(DRFI TA) in Caribbean Overseas Countries and Territories (OCTs)’ pa mehora resiliencia financiero pa contra-aresta desasternan a termino largo, na beneficio di gruponan mas vulnerabel. E DRFI TA ta un alianza entre Union Europeo, Grupo Banco Mundial y e Facilidad Global pa Reduccion di Desaster y Recuperacion, GFDRR. E programa ta parti di e RESEMBID, cu ta Resilience, Sustainable Energy and Marine Biodiversity pa paisnan Caribense. E programa ta implementa pa Expertise France, Grupo Banco Mundial y GFDRR.

Dos pilar

E strategia di siguridad di cuminda sostenibel pa Aruba por ta basa riba dos pilar. E prome ta cuminda na nivel comercial y agricultura basa riba expansion di un serie di expansion di negoshi particular y negoshinan nobo cu por funcciona como empresanan di cuminda y agricultura stabil y exitoso. E di dos ta stimula productornan cu ta opera na nivel micro unda ta haci uso di e tererenonan y awa na forma eficiente, unda ta incorpora tecnica y ekiponan cu ta tanto bon pa clima y a demostra di ta funcciona.

Pa cada pilar mester considera diferente factor disponibel pa production optimal, incluso tereno, awa, e medio pa crece, technologia, energia, labor y conocemento, ademas di capital y rekesitonan financiero como tambe oportunidad di mercado. Liñanan di guia strategico por pusha e e desaroyo di cada pilar y e resilencia general di e sector agricultura. Esakinan ta inclui un campaña strategico di comunicacion publico, pa hisa produccion local, mehora demanda pa produccion local, mehora stardardnan di calidad pa produccion local, incentiva experimentonan den produccion, envolvi hubentud, inicia technologianan inovativo, permiti acceso na investigacion global y recursonan pa medio di alianzanan internacional y analisis y evaluacion di produccion continuo pa asina por compronde miho e resultadonan

Agri-Bank

Banco Mundial ta conseha pa Aruba inverti den expansion comercialmente viable y empresanan nobo pa medio di identificacion,evaluacion y selecta proyectonan di inversion individual, desaroya plannan di negoshi pa financia clientenan pa cuminza of expande proyectonan, y hiba funccionnan di ‘followup’ y evaluacionnan. Apesar cu Gobirno di Aruba no a identifica un mecanismo di financiamento, Banco Mundia den su documento a dicidi pa referi na uno, cu ta e Banco Agri (Agri-Bank).

Ehempel di expansion ta inclui companianan cu ta bende por mayor of distribuidornan cu ta inverti den procesamento di cuminda, of supermercaodonan cu ta incorpora produccion nan mes. Un ehempel di integracion horizontal por ta un empresa di pesa cu ta inverti den aquacultura of un hotel of grupo di restaurant cu ta inverti den cerveceria craf of un produccion local di produccion di juice. Proyectonan nobo -start-up, ta inclui inversionistanan cu na e momentonan aki no ta envolvi den e negoshi di cuminda of agricultura , pero ta mira oportunidad pa cuminza cu uno, kizas usando tecnologia nobo.

Proyectonan Bio-tecnico nobo mester inclui esnan cu ta traha den e asina yama tissue culture. (red. tissue culture ta e cria/crecemento di celulanan den un medio artifcial separa di e organismo madre. E tecnica ta conoci como propagacion micro y ta facilita typicamente pa uso di un medio di crecemento likido, semi likido of hasta solido). Pero Banco Mundial ta referi tambe na produccion di alga, di hongo (mushroom), agricultura salino, of servicio of producto di salud di mata y animal. E desaroyo di fragancianan di azeta esencial, como tambe extractonan di matanan medicinal of productonan cosmetico tambe ta cay den e grupo di companianan cu por inicia.

Actividad micro

Promocion y inversion den produccion di cas y comunidad na nivel micro, unda ta cuminza cu envolvi publico y promove e iniciativa nacional pa expande actividadnan di produccion agricultural y di cuminda. Aunke cu e prome enfoke lo ta hardinnan di cas of cria di animal, e mester por inclui tambe procesamento simpel di cuminda of tecnica di preservacion di cuminda pa consumo pa famia of pa benta.

Actividadnan asina, cu ta logra pone riba pia cu tempo, hunto cu un menu amplio di tecnologia na nivel micro y di sistema di produccion ta inclui con pakete di plan di construccion standarisa di unidadnan of sistemanan di produccion na nivel di comunidad cu por yuda hogarnan, scol, prison, hospital of otro organisacion comunitario.

Mester tin sosten institucional y di maneho pa productividad di cuminda y agricultura local unda ta enfoca riba establecimento di un sistema pa sigui e avanzenan di e produccion, cu ta financia pa locual Banco Mundial ta considera un Banco Agri of otro fuente.

E componente aki tambe lo percura pa recursonan pa continuamente monitor y identifica tecnologia y inovacion existente y nobo cu ta relevante pa Aruba. Tambe e lo monitorea y agrega informacion necesario y relevante pa proteccion di salud di mata y animal, risiconan conoci pa e siguridad di cuminda, of preocupacionnan cu por lanta den cualkier inversion. Mas ainda, e componente aki lo fomenta mas coneccion entre agricultornan y consumidornan y e sector di horeca, pa asina promove gastronomia genuino.

E paso aki lo por beneficia Aruba pa medio di logro di provision local, y asina tambe eleva e experiencia di turistanan. Basa riba e experiencia di restaurant y hotel cu ta usa cuminda produci local, lo por haci mas analisis pa identifica cua ta e productonan nobo cu por keda agrega pa asina sigura e consistencia di producto.

Ehempel ta inclui promocion di coneccionnan di procesadornan di agricultura pa medio di reforsa y desaroya abilidadnan den e sector y promove inversion y aliansanan pa pone e abilidadnan traha pa Aruba. E companianan di agricultura cu tin e facilidadnan aki lo por bira un atraccion pa bishitantenan cu lo kier experiencia esakinan pa medio di tours.

Finalmente, e ultimo componente aki lo promove e resiliencia fiscal di e sector agricola pa medio di acercamento inovativo di proteccion financiero. Ehempelnan ta inclui e establecimento di investigacion riba agricultura y desaroyo di alianzanan entre institucionnan relevante local y internacional, y coordinacion entre e proveedornan domestico y Gobierno pa facilita e acceso na cobertura pa medio di un seguro pa productornan existente y nobo. Den otro palabra, crea un sistema pa brinda seguro na e productornan.

Farm to Fork

Tin diferente tema cu ta mishi otro cu ta merece mas exploracion y consideracion den e desaroyo di strategia, segun Banco Mundial. Prome, e modelo multi-facetico di ‘Farm to Fork’ por haci uso di tendencianan global di turismo, establece relacionnan entre productornan y restaurantnan, pusha demanda pa productonan cu ta procesa localmente y hisa entrada pa medio di creacion di experiencianan pa agro-turismo, conectando cuminda y cultura. Un pais cu a haci esaki ta São Tomé and Príncipe, cu por ta considera e ‘miho practica.’ Cu e expansionnan proponi di produccion di agricultura domestico, mester tin alocacion di suficiente recurso cu ta mester ta significante produccion di cuminda cu ta sigur y cu ta cumpli cu standardnan di calidad, como tambe educacion y training.

Crea relacion pa un negoshi agricola exitoso

Un Banco-Agri lo por adopta e Modelo di Alianza Productivo, cu hopi pais den region ta implementa. Di e forma por garantisa e alocacion efectivo y transparente di fondo y pa fomenta e desaroyo di relacionnan eficiente entre tur actor di agricultura riba e isla. E modelo y su fondonan y programa di prestamo priva lo enfoca riba facilita e creacion di iniciativanan di negoshi agricola chikito y prominente, pa medio di iniciativanan pa trece e agentenan principal hunto, esta productornan, cliente y provision di asistencia tecnico.

Finalmente, lo mester explora agro-logistica bou e sistema aki cu ta den desaroyo. Comercio internacional tin en principio, un sistema cu ta funcciona bon. E agro-logistica di mercado loca lo por keda desaroya naturalmente basa riba potencial produccion nobo y e papelnan cu aspectonan nobo lo tin pa genera consistencia di suministro den produccion local.

Un team di Banco Mundial a ehecuta e trabou den cooperacion cu Departamento di Asuntonan Economico, Comercio y Industria, Departamento di Agricultura, Cria y Pesca, Ministerio di Finanzas, Asuntonan Economico y Cultura y Ministerio di Asuntonan General, Integridad, Organizacion Administrativo, Inovacion y Energia. E organisacionnan cu a participa ta varia di organizacionnan publico y semi publico, asociacionnan comercial, companianan di utilidad y companianan y individuonan envolvi den actividadnan di agricultura.

LEAVE A REPLY

Please enter your comment!
Please enter your name here