Organisacion Panamericano di Salud (PAHO) kier pa salud di personal medico ta e prome prioridad. Esaki mientras Barbados ta registra e prome morto di un trahado di salud – un enfermero assistent na Queen Elizabeth Hospital (QEH) – y ta cuminsa lansa su programa di vacunacion.
Dr. Yitades Gebre, representante di PAHO/WHO na Barbados y paisnan oriental di Caribe, den nomber di director di PAHO, Dr. Carissa Etienne y personal di PAHO na e pais a extende condolencia na gobierno y pueblo di Barbados.
Na mes momento, Dr. Gebre a bisa: “Nos kier reenfatisa cu e seguridad y proteccion di trahadonan di salud ta di maximo importancia, ya cu nan ta e pilar di nos sistema di salud. E preocupacion primario di PAHO ta pa sigura cu trahadonan di salud tin acceso na Ekipo di Proteccion Personal (PPE). Falta di PPE of training corecto riba con pa usa esaki ta un di e factornan cu ta contribuyendo na infeccion di trahadonan di salud. Nos ta adresando e problema aki desde comienso di e pandemia.”
Dr. Gebre tambe a declara: “Otro factornan contribuyente cu legisladonan mester adresa ta reduccion di cantidad di trabao y stress riba trahadonan di salud. Nan mester sosten psico-social den e circunstancianan dificil aki. Comunidadnan por haci nan parti door di adopta comportamentonan cu ta reduci transmision di malesa pa asina e sistemanan di cuido di salud, y como resultado e trahadonan di salud, no ta sobrecarga. Nos tur tin un rol pa hunga.”
