E isla chikito Barbuda, parti di e pais Antigua & Barbuda, na 2017 a sufri pisa di e forsa destructivo di horcan Irma. Mas cu dos aña despues, ainda hopi habitante ta lucha pa yega na un bida normal atrobe. Un grupo entre nan ainda ta biba den tent o cerca famia, pasobra gobierno su plannan pa crea vivienda nobo no ta avansa.
Activista di medio ambiente John Mussington ta bisa cu e proceso di recuperacion di e desastre tabata penosamente slow. E ta kere cu gobierno ta parce mas interesa den desaroyo comercial cu trata di cumpli cu necesidadnan di su ciudadanonan afecta pa e horcan di categoria 5 cu a devasta e isla casi tres aña pasa.
Gobierno recientemente a anuncia plan pa haci groundbreaking pa construccion di 10 cas ‘eco-friendly’ y resistente contra horcan. Mussington a conta Loop News cu e hecho cu e casnan aki ainda no ta construi ta apoya su critica, cu tin demasiado poco progreso.
“Hopi di nan ta biba den tent, hopi di nan ta keda cerca famia na Antigua. Esencialmente ainda tin hopi hende cu no a settle ainda pasobra no a recupera e cantidad di vivienda. E proyecto particular aki tabata diseña pa duna cas na e personanan ey. E malo ta cu dos aña y mey despues, bayendo pa tres, nos ainda mester lidia cu e asuntonan aki.”
E ta reclama cu un cierto cantidad di proyecto di desaroyo cu gobierno a propone pa Barbuda, ta significa un riesgo serio pa e ecosistema fragil di e isla. “Nos ta lidiando cu un situacion na nos area nacional mas importante, Codrington Lagoon National Park, bao proteccion di tratado internacional. Nan ta desea di kita awor un tereno di 650 acre di e Parke pa desaroyo comercial. Con esey por ta den un area protegi,” el a expresa.
