Protesta den sosten di un rapper cera den prison a resulta den violencia pa di seis anochi consecutivo na Barcelona ayera.
Manifestantenan principalmente bisti na preto a tira piedra y otro obheto riba agentenan di polis cu tabata pafo di sede di polis nacional den centro di e ciudad Spaño.
Mas di 100 persona a keda aresta den e enfrentamento violento cu polis desde cu a aresta Pablo Hasel diamars ultimo, pa cumpli cu un sentencia di nuebe luna di prison pa su tweetnan y letranan di cantica insultando e monarca Spaño y elogiando violencia terorista.
Igual na e dianan anterior, ayera a cuminsa cu un protesta pacifico na Barcelona, unda artistanan di graffiti a pinta un mural critico di rey Spaño, Felipe VI y su tata, ex-rey Juan Carlos I, pa mustra loke nan a yama solidaridad cu Hasel.
Pero asina cu a bira anochi, e tension a aumenta mientras hobennan rabia a marcha door di centro di ciudad na sede di polis.
Despues di mey ora di wordo tira cu piedra, boter, desperdicio y klapchi, polis Catalan a avansa cu sosten di vans pa despeha e caya dilanti di e stacion.
Polis Catalan a bisa diasabra cu a haci mas di 35 aresto na Barcelona y otro barionan cercano despues cu manifestantenan a kibra bentana di tienda y participa den bataya contra polis. Otro protesta na Spaña, incluyendo na capital Madrid, a keda principalmente pacifico.
