Barco di carga Cristina Star a bishita Aruba

Diabierna mainta, e barco di carga Cristina Star a sali rumbo pa Trinidad, despues di permanece mara un dia den nos waf na Barcadera. E barco aki ta un di e mas grandi nan cu a yega di drenta nos waf di carga.

Segun manager nautico di Aruba Port Authority (APA), Irvin Gil, e barco aki tin un largura di 243 meter y e tin capacidad di carga di 37.113 ton. E barco a bin for di Cartagena (Colombia) y a drenta waf di Barcadera diahuebs mainta. El a bin Aruba pa carga 340 container bashi di e liña di Container CGM.

E barco a yega pilot station diahuebs pa 6.30 mainta na unda e pilot nan a subi abordo. E senior loods cu a drenta e barco ta Hubert Semeleer, y a wordo acompaña door di e loods, Siglai Frank. E pilot a haya asistencia di e tug boatnan Colorado y Nanki. Ayera mainta e pilot, Jean Michael Varlack den compania cu e pilot, Siglai Frank tabata encarga di e salida di e barco Cristina Star.

Tabatin barconan cu mas o menos mesun dimension, cu a yega di drenta e puerto di Barcadera caba. E barco aki a bin Aruba specialmente pa carga e containernan bashi di e liña di Container CGM. Mientras cu e otro tankeronan cu a yega di bin a bin mas tanto pa mantencion y reparacion di nan motor. Gil a splica cu a pesar cu e barco aki tin un gran tamaño, e por drenta sin dificultad den nos waf di Barcadera; mientras esun cu ta bin cu e autonan mester wordo mara den nos waf na Oranjestad. El a bisa cu e barco cu ta transporta e autonan ta mas dificil pa maniobra. Nos ta hopi limita den espacio pa maniobra ya cu nos solamente 280 meter. E barco cu ta transporta autonan cu e biento cu nos tin na Barcadera, e pilotnan no kier tuma e riesgo pa mare na Barcadera. Esaki no kiermen cu no ta posibel, ya cu nan a haci bou simulator, pero toch e pilot ta prefera pa hacie na Oranjestad. “Pero nan no kier tuma e riesgo ey. Pakico nan tin cu tuma e riesgo ey, si bo por mara e barco mas safe na Orajestad!,” Gil a bisa.

Den e waf di Oranjestad bo tin un entrada y bo tin un salida, mientras den e waf di Barcadera no ta asina. Ya cu pa maniobra den e waf di Barcadera, e pilot tin cu draai e barco den e waf di Barcadera mes, y esey ta haci e maniobra mas dificil.