BBO na frontera… Lo tin frontera…?

E tratamento den parlamento ayera di e ley di modificacion di e ley di BBO, pa inclui e introduccion e cobro di BBO na frontera, a trece mas confusion cu claridad. Esey no tabata responsabilidad di gobierno so, sino tambe di e otro partinan interesa. Awor no mas, na momento cu e proyecto di ley ta den parlamento, hopi mas di e detayenan ta bin dilanti. Problema mas importante ta cu nos sa unda e cos aki ta cuminza, pero no unda e ta caba, pasobra no tin claridad riba introduccion posterior di un BTW.

Mientras ta pretende cu e modelo di BBO aki ta un prefase pa introduccion di BTW despues, e ta diferente riba e punto unda no ta tuma e valor agrega cu un empresario ta logra cu un producto importa; e BBO ta tuma na cuenta e valor di e benta realiza. E definicion di ‘handelsgoederen’ cu gobierno a scoge ta limita na solamente e mercancia cu ta destina pa rebenta, sin cambia algo na su caracter. Esaki ta exclui tur material cu ta drenta e pais pa ser bendi posteriormente den un forma transforma y e productonan necesario pa por opera un empresa, sin cu tin rebenta di e producto mes. Esaki ta exclui e grupo mayoritario di e posibilidad di haya nan BBO paga na frontera back. E restaurant y hotelnan cu enberdad tin e problema ey a tuma paso pa comunica esaki cu gobierno. En todo caso gobierno a admiti e problema crea cu e definicion pa sector di restaurant y hotel y a haci e promesa pa regla esaki den un decreto ministerial; ‘hay que ver para creer’. Ta parce obvio pakico a formula e asunto asina. Uno ta cu ta limita e empresanan cu ta bin na remarca pa haya restitucion, segun gobierno alrededor di 200, loke ta haci trabao administrativo hopi mas facil y ademas ta maximaliza e entrada cu gobierno lo cobra di e medida aki, pasobra e parti grandi di sector priva no lo haya e facilidad aki. Di otro banda ta argumenta cu e medida lo crea un ‘level playing field’ pasobra esnan cu ta operando ilicitamente no por haya restitucion y mester aumenta prijs. Esey ta un bentaha pero di otro banda e sectornan legal cu ta keda afecta pasobra nan tampoco ta haya restitucion pa nan importacion ta considerable.

Asina mes ta pretende cu introduccion di e ley aki lo no tin consecuencia inflacionario, loke entre otro no ta cuadra cu opinion di Raad van Advies cu gobierno a ricibi. E medio aki tambe a trece algun tempo pasa dilanti cu di mes lo tin inflacion a base di e pre-financiamento cu hopi empresario lo mester haci. No tur cos por financia for di cashflow y fia placa ta costa placa. Esey ta e caso di esnan cu por haya un areglo di restitucion, pero esun cu no por haya restitucion no tin otro opcion cu aumenta nan prijs… Esaki por resulta den un inflacion mas fuerte cu loke ta proyecta awor .

Pero lagando e discusion tocante e detayenan di e ley un banda, loke ta remarcable ta e falta di vision di gobierno riba kico ta e reforma fiscal cu lo mester ta e base di e asunto actual. No ta trata solamente di e promesa – vago – di un BTW na algun momento den futuro, pero unda e afamado simplificacion di nos sistema fiscal a keda? Nos por mira cu a bin cu un simplificacion parcial di impuesto di importacion, pero pakico no atende e asunto ey na un manera mas eficaz? Nos ta keda keto bay cu un cantidad di impuesto cu no ta necesario, cu bien por elimina, mientras e ingreso perdi ey por sali di e aumento di impuesto indirecto, basta nos deshaci di e BBO cumulativo cu ta keda un sumpiña den nos cuero, pasobra ta e sistema ey, cu ta keda, ta e problema di efecto inflacionario genera localmente, banda di e inflacion importa.

E problema ta cu na ningun momento gobierno a yega di presenta e plan total di unda kier yega cu e reforma fiscal. A corta e plan den diferente fase y ta laga nos sa di e asunto ‘pida pa pida’, sin cu ta duna un vista riba e situacion final. Y pakico no ta duna e claridad ey? E ta lanta e sospecha cu nan mes no sa unda lo termina, o nan simplemente no ta desea cambia nan manera di mantene secretismo te na ultimo… Si nos ta scucha varios parlamentario bon, no tin ningun compromiso pa yega finalmente na un BTW. Esaki ta importante pasobra banda cu e BBO na frontera ta duna solamente parti di sector priva acceso na e sistema di areglo y restitucion, cu aumento di prijs pa e otronan, ademas no ta elimina e sistema cumulativo di BBO, cu ta keda pusha inflacion genera localmente den tur cadena di benta, di 7% riba 7%, aparte di e inflacion halto importa. Si ta e intencion a largo plazo pa mantene inflacion mas abao posible, loke mester ta meta di cualkier gobierno, anto nos mester e cambio pa un BTW, y mas pronto posible.

Finalmente, ta casi chistoso pa tende gobierno gaba cu tanto profesional a traha tanto aña asina duro riba e ley aki, a presenta e promer diseño na Raad van Advies na 2019 caba, pa finalmente bin presenta awor algo asina curu na parlamento.