Ayera mainta a tuma luga e Water Adaptation Community Webinar: The Climate Emergency on Small Islands – challenges and opportunities, na unda Minister di Transporte, Integridad, Naturalesa y Asunto di Adulto Mayor, Ursell Arends adresa e problemanan actual di emergencia climatico cu tin na Aruba y esfuersonan cu ta andando pa trece solucion pa esaki.

“Ta un honor pa mi conecta cu boso awe pa conta e historia di clima di Aruba, e desafionan cu nos ta enfrenta, e oportunidadnan cu nos ta wak y e iniciativanan di adaptacion cu nos ta trahando riba dje,” Minister Arends a expresa.

El a indica cu manera hopi otro isla chikito, e impactonan cu Aruba por enfrenta por ta desalentador. Aruba ta un destinacion turistico popular y su economia ta depende casi completamente ariba esaki.

No ta un secreto cu Aruba importa 99% di cuminda cu e habitantenan ta consumi y den esaki tambe, el a agrega, e falta di seguridad di alimento ta un preocupacion grandi.

El a splica cu Aruba tin un di e plantanan di tratamento di awa mas bieu na mundo cu ta produci awa pa bebe di calidad halto. Na mesun momento el a subraya cu si acaso e planta sufri daño di por ehemplo condicionnan climatico extremo y produccion di awa no ta posible, el a enfatisa cu e realidad di e cuestion ta cu e awa cu tin den reserva lo por sostene solamente cuater mil persona. Esey ta ekivalente 0.003% di e poblacion local y turistico di e isla.

“Aunke Aruba supuestamente ta cay pafo di e trayecto di horcan, aña pasa nos a wak cuater tormenta cu a gestiona parti noord di Aruba cu tur a bira sistemanan grandi,” el a señala.

Minister Arends a menciona tambe cu siman pasa apenas, e tormenta Bret, apenas e di dos tormenta nombra den e temporada di horcan, segun pronostico mester a pasa 245km leu di Aruba na e parti noord, pero a pasa apenas 70 km leu y despues a dicipa.

Esaki ta refleha solamente un parti chikito di e multitud di desafio cu Aruba como isla chikito ta enfrenta y kico exactamente tin den e futuro cercano y leu, ta bastante insigur.

Arends a enfatisa cu asina Aruba ta reevaluando e prioridadnan y co-diseñando activamente Aruba su resiliencia climatico cu partnernan local como tambe partnernan internacional, a traves di e balornan comparti mientras nan ta tuma bentaha di e oportunidadnan cu ta nace for di e crisis existencial aki.

“Ta durante temponan di adversidad cu innovacion y creatividad ta florece. Nos ta biba den un momento unico den tempo unda cu nos por encontra nos caminda atrobe y den esaki aki tambe Aruba ta adresa e triple emergencia climatico enfocando ariba solucionnan basa riba naturalesa como parti di e esfuersonan di adaptacion,” el a remarca.

Minister Arends a indica cu actualmente Aruba ta den proceso di expande su parke marino den un parke marino full rond di e isla, usando planificacion teritorial pa maneha efectivamente y balansa e uso di e awanan di Aruba.

Di otro banda el a menciona cu e ta insigur si esaki ta bay suficientemente ambicioso y den esaki tambe su ministerio ta explorando simultaneamente e posibilidad di ABC MPA, cu islanan di Corsou y Bonaire.

Adicionalmente el a sigui splica cu nan a establece tambe un conseho di resiliencia climatico, NCRC, cu ta encarga cu e desaroyo di strategianan pa reduci vulnerabilidadnan, mehora capacidadnan di adaptacion y promove preparacion climatico pa 2030.

El a remarca cu e NCRC ta basa riba e modelo climate quintech nobo cu ta uni sector publico y priva, institucionnan di conocemento y organicacionnan no gubernamental.

“Manera cu clima ta crusa fronteranan, e conseho tambe ta acepta partnerships internacional pa yena buraconan di experticio y yuda nos sigura financiamento climatico den futuro,” el a señala.

El subraya cu pa crea un propuesta cu solucionnan cu ta enfoca ariba naturalesa, Gobierno di Aruba a crea derechonan di naturalesa den e constitucion y unabes cu e derechonan aki ser acepta, e derechonan hereda di e ecosistema ta bay ser reconoci pa tur legalmente.

“Esaki lo defini pa semper e tumamento di decisionnan den futuro pa proteha activamente nos habitat natural di invasion y degradacion,” Minister Arends a enfatisa.

Por ultimo el a sigura cu Gobierno di Aruba ta completamente comprometi na e sobreviviencia y pa co-diseña Aruba su resiliencia cu cualkier persona o organisacion cu kier traha cu e isla. “Nos tur mester amplifica nos esfuersonan ariba un escala local y global,” el a remarca.

Den luna di mei a tuma luga e Caribbean Climate & Energy Conference na Aruba na unda Minister Arends a trece pa dilanti su ponencianan tambe pa loke ta trata su plannan di clima y energia pa Aruba.

Un factor critico cu el a pone enfasis riba dje cu ta esencial pa e exito di e plannan ta conscientisacion. “Mi no ta papia di conscientisacion den e sentido tradicional. Mi ta papiando di un diferente tipo di conscientisacion. Mi ta papiando di “conscientisacion” riba e pregunta di ken por logra e cambio aki,” el a indica den un comunicado di prensa.

Den e comunicado di prensa el a referi na e punto cu cambio climatico no conoce frontera nacional. El a enfatisa cu pa Aruba, e elemento clave den iniciativanan di clima y energia limpi, ta den e capacidad pa crea e conscientisacion, cu e lo exigi cooperacion mutuo entre e publico domestico y sector priva.

Pa loke ta cooperacion adicional, el a menciona e conferencia di Our Ocean na Panama algun luna pasa, na unda un di e puntonan principal tabata cu no por papia di clima sin papia di salud di nos ocean.

Minister Arends a indica, e tempo ey caba, cu nan ta ocupa cu expansion di e parke marino cu actualmente tin 4 area pa cubri henter e isla, pero den su opinion esaki no ta suficiente si Aruba kier logra e mandato di 30×30 y no ta suficiente tampoco, el a agrega, pa reforsa Aruba su resistencia y capacidadnan di naturalesa pa por absorbe impactonan di cambio climatico.

Den esaki el a referi na e ABC MPA cu el menciona durante e Water Adaptation Community Webinar. “Mi ta kere fuertemente cu nos mester, como minimo, papia di un area marino proteha di ABC, Aruba, Boneiro y Corsou, caminda nos por usa planificacion espacial marino como un herment pa maneha nos awanan responsabelmente den un forma colaborativo,” el a remarca.

El a señala cu si mira na e localisacion di Sint Maarten, Saba y Statia, como Reino, kisas Aruba mester cuminsa boga tambe pa un area marino proteha cu ta cubri henter Caribe. El a enfatisa cu esaki por duna Aruba e oportunidad pa maneha e region di Caribe na un forma mas efectivo, mas economico y tambe ta habri porta pa atrae financiamento pa e maneho responsabel pa Aruba su recursonan natural marino y tambe pa mas actividad economico.