Den luna di mei, Bureau City Inspector (BCI) a anuncia cu na final di juni/ cuminsamento di juli lo cuminsa cu un accion, conhuntamente cu Cuerpo Policial di Aruba, pa soluciona e problema di autonan staciona y bandona ariba camindanan publico. Vocero di BCI, Robby Rossel den un conferencia di prensa diabierna a indica cu awe 4 di juli e accion aki lo cuminsa y a manda notificacion na doñonan di e autonan aki.

 

Dialuna 4 di juli ta e fecha oficial cu Cuerpo Policial di Aruba conhuntamente cu inspectornan di Buereau City Inspector lo cuminsa cu e recogemento di auto. Rossel a splica cu ya caba e proceso a cuminsa den San Nicolas na unda nan a laga carta di aviso pa cada un di e doñonan di autonan aki, cu ta e autonan cu ta para ariba acera y tin añanan para eynan, autonan cu falta taira, autonan cu no tin number di auto ni seguro.

Anteriormente Rossel a splica cu no ta for di luna, sino pa varios aña caba, for di aña 2019 cu nan a introduci e prome campaña pa conscientisa comunidad ariba e autonan bieu, autonan cu ta para banda di caminda y riba caminda, autonan cu no ta para riba un parking space y no ta para ariba un espacio di parkeo publico, pero ta para ariba caminda unda cu auto mester mobilisa.

Esaki ta un di e situacionnan mas alarmante, Rossel a indica, cu aña aden aña afo e autonan aki ta keda para. Bisiñanan ta reclama cu tin autonan para dilanti di nan cas, y Rossel a subraya cu nan tin varios aña caba andando cu e situacion y p’esey nan a yega na e decision pa tene e accion aki pa asina purba soluciona e problema.

Rossel a bisa tambe cu nan a combersa cu varios di e personanan en cuestion tambe, caminda cu tin di nan a bisa cu nan no tin luga pa pone auto y cu nan no lo kita e auto cu ta para riba un caminda publico. El a subraya cu e autonan lo wordo recogi, cu e doño kier of no.

“Tin cu bisa cu dia 4 di juli e autonan lo wordo warda. E autonan cu ta descompuesto lo wordo hiba pa takelwagen pa hero bieu, e autonan cu tin seguro y autonan cu tin number di auto lo wordo hiba tambe. Nos ta bezig cu Balashi pa e autonan wordo hiba y warda eynan”, Rossel a indica.

El a remarca cu e persona cu ta doño di e auto lo mester paga un boet. Cuerpo Policial ta bay t’ey presente durante e accion aki pa reparti e boetnan necesario.

Segun Rossel a sigui splica, e accion ta reparti den e barionan di Aruba y cada siman nan lo ta den diferente bario. For di dia 4 di juli te cu 8 di juli nan lo ta den San Nicolas y Savaneta. Dia 11 di juli lo move pa e area di Pos Chikito y un parti di Simeon Antonio. Dia 15 di juli nan lo cuminsa den Santa Cruz, Piedra Plat y Paradera. Dia 18 di juli nan lo ta den Dakota, Oranjestad y Noord. Y por ultimo dia 22 di juli e accion aki lo termina cu un rueda di prensa, pa asina informa ariba e cantidad di auto cu a wordo kita for di e camindanan publico.

“Ya caba nos por bisa cu tin un cantidad di 17 auto den San Nicolas cu a wordo kita caba y fuera di esey tin ocho auto cu e doñonan mes a kita esakinan, segun controlnan cu nos a haci”, el a agrega.

Rossel a haci un suplica tambe na tur garage ilegal cu tin na Aruba, esakinan tambe ta wordo controla. El a menciona cu tin cuater garage ilegal den San Nicolas cu ta den estado deplorabel, autonan poni riba caminda, azeta basha ariba tereno publico, azeta cu ta drenta den e tera y ta daña e parti di naturalesa y cu ta molestia bisiñanan. Esakinan tambe lo wordo controla y Cuerpo Policial di Aruba lo parti boet pa esakinan tambe.

Rossel a tuma e oportunidad pa recorda na comunidad cu mester tene cuenta cu tin un ley cu ta bisa cu no por para auto ariba caminda publico, autonan cu ta keda pa temporada largo y autonan bieu tampoco no ta permiti. “Nos ta cuminsa hunto cu Minister di Medio Ambiente pa nos por mantene e isla di Aruba limpi. Esey ta un meta cu tin poni y sigur nos di Bureau City Inspector tin cu cumpli cu esey”, el a bisa.

Recientemente a tene accion di limpieza na Balashi pa loke ta trata autonan cu tabata warda eynan, Rossel a ricibi e pregunta si e accion aki cu BCI lo ta realisando no lo perhudica locual nan a haci na Balashi. El a comenta cu e no ta kere e lo wordo perhudica pa motibo cu cada auto cu wordo hiba eynan e doño di e auto ta na altura cu e auto lo ta eynan y na momento cu doño bay busca e auto, e lo tin cu paga pa saca e auto.

“Dialuna 4 di juli nos ta drentando San Nicolas y ya caba pa 9or di mainta mas o menos e

autonan ta cuminsa wordo manda, otro ta wordo benta afo pa hero bieu, otronan lo wordo

transporta pa warda di Balashi y esnan cu no kier pa nan auto wordo kita of esnan cu no kier

laga e auto bay, automaticamente Cuerpo Policial lo tey tambe pa parti un boet”, Rossel a finalisa.