E controversia entre gobierno di Aruba y e colegio di supervision financiero CAft no a termina ainda. Mientras tanto CAft a confirma di a ricibi e contesta riba nan carta di 19 di juni ultimo, cu pa ley lo mester tabatin un respuesta di parti di gobierno dia 24 di juni ultimo. Den su contestacion gobierno ta tuma un posicion fuerte contra e ponencianan di e organo consehero. Esaki por mustra riba un continuacion di e diferencianan di opinion, aunke e colegio consehero por dicidi ainda di no hiba tur e asuntonan aki pa gobierno di Reino proximamente, sino solamente algun considera importante.

Un di e puntonan di mayor confrontacion ta e gastonan di personal, cu interpretacion diferente di e acuerdonan a base di cual mester opera. Esakinan ta e ley di supervision financiero (Laft) y e protocol di november 2018. E protocol a establece un limite maximo di Afl. 479 miyon desde inicio, y cada aña e gastonan di personal mester baha “nominalmente’. Pero e protocol ta bisa tambe, den e seccion II articulo 4, cu: “Aruba ta tuma medida complementario pa termino mediano y largo pa laga e gastonan di personal structural sigui baha nominalmente.” Awor, segun gobierno, a tuma e medida pa baha gasto nominalmente cu 3 miyon florin pa aña, segun nan plan BVP. A base di esey e norma di gasto di personal maximo na 2022 lo ta Afl. 467 miyon, y ta mustra cu e gastonan proyecta pa e aña aki ta keda bao di e limite ey, esta Afl. 433 miyon.

Aki tin dos punto importante. Uno ta cu di e manera aki ta keda e pregunta unda e medidanan “complementario” di cual e protocol ta papia, ta keda. E motibo pakico esaki ta importante ya cu baha gasto cu 3 miyon florin pa aña so ta crea un caminda largo pa yega na reduccion sustancial. Asina aki ta yega na un limite di 450 miyon florin despues di 6 pa 7 aña…

Ademas, den su proyeccion multi-anual, presenta cu presupuesto 2022, gobierno a pone un suma fiho di 458 miyon florin di gasto di personal, pa cada aña, di 2023 te 2026. E suma di 458 miyon lo tabata e limite na cual lo a yega na 2025, contando reduccion di 3 miyon pa aña. Asina, segun argumentacion di gobierno, lo ta cumpliendo cu e norma acorda den e protocol, pero no ta bisa cu gobierno ta haya anto cu tin espacio pa aumenta gasto di personal den e proximo añanan, kedando bao di e limite auto-imponi di 3 miyon menos cada aña.

 

Un manera bastante creativo pa presenta e asunto, sin embargo, no ta mira unda e medidanan complementario menciona a keda. No cu nan no ta existi; nan ta aparece den e Agenda di Ehecucion acorda cu Hulanda. Entre otro esey ta encera atende e asunto di e incremento automatico di tur salario a base di e ‘periodiek’. Ta bon conoci pakico no a sucede nada riba e tereno aki; e ta toca interes politico di gobierno y pesey no ta haci nada. Loke si a haci ta introduci pa di tantisimo vez e ley di VUT, di cual ta conoci cu e efecto ta insignificante. Di e manera aki, segun nos opinion, gobierno ta trata di crea e posibilidad pa nan mes pa no cumpli cu e protocol, en todo caso no den tur aspecto.

Tin otro asunto cu tambe a drenta e discusion y esey ta e caminda proponi cu mester core pa yega na un gasto di personal gubernamental cu ta bao di 10% di GDP. Hasta nos a tende comentario cu e norma aki lo a bin na lugar di e protocol di 2018. Esey simplemente no ta e caso. Ademas, si ta desea di usa e criterio aki, lo mester aplica esaki segun e normanan internacional estableci pa esey. Nos por corda e analisis cu IMF a haci pa gobierno di Aruba na fin di 2018, cu tabata encera tur gasto relaciona cu personal, segun e criterionan internacional, unda e tempo ey e gastonan tabata yega na Afl. 605 miyon, y no 479 miyon. Esaki pa motibo cu no ta trata solamente di gasto di e ministerionan pa loke ta ambtenaar, sino tur gasto di salario subsidia, personal di uitzendbureau, personal saliente via VUT, plus e empleadonan publico di e entidadnan estatal halto. Eseynan conhuntamente tabata yega na e suma menciona den e informe di IMF. Si ta e criterio ey ta bay maneha, ta bon, pero ban compara ‘appel cu appel’.

CAft tin un opinion diferente, mustrando riba e partinan cu gobierno lo ta ignorando di e protocol. Con e asunto aki lo keda finalmente den e conseho final di CAft no ta conoci ainda, pero mester tuma na cuenta cu tin un acuerdo cu entre Hulanda y Aruba caba, pa implementa e eliminacion di e recorte di 12,6%. Pero…, esaki ta mara na cumplimento cu e protocol pa 2023, unda mester tin un surplus riba presupuesto. Y ta dificil pa yega na e surplus ey, si ta pretende di aumenta gasto di personal na 2023 cu 25 miyon florin… Esey ta practicamente imposible, aunke e ta keda, cu e 458 miyon menciona, bao di e norma cu gobierno a establece pa su mes. Cu o sin ‘aanwijzing’, no tin opcion pa seriamente reduci gasto sin mishi cu gasto di personal pa 2023.