E introduccion y aumento di pakete di impuesto bou e nomber di crisisheffing y/of BAVP a genera preocupacion cerca e gremio sindical pa loke ta trata negociacion di contracto colectivo (CAO) y aumento salarial. Ademas di e consecuencianan y instabilidad cu medidanan asina por trece den nos mercado laboral.

Pa mediador di gobierno, Anselmo Pontilius, kende tin e tarea entre otro di intermedia den cualkier conflicto laboral, ta considera cu ‘ta tempran ainda pa mira ki cifranan entre otro departamento di estadistica (CBS) lo saca afo riba efectonan di e pakete di impuesto aki riba e nivel di costo di bida’.

E ta haya cu e data aki ta importante tanto pa e dunadonan di trabou como pa e sindicatonan cu tin cu negosha condicion di trabou. E punto cu ta keda si e sindicato cu ta representa e trahadonan ta keda persisti riba aumento salarial como punto principal den e mayoria di negociacion di CAO. E ta considera cu ta mas cu claro cu tur trahado kier wak adelanto di nan salario pa motibo di e costo di bida.

E mediador di gobierno a bisa cu nan oficina a yega di sugeri pa basta tempo caba pa tene cuenta pa negosha beneficionan secundario den CAO. E ta kere cu mayoria di e dirigentenan sindical ta consciente cu mester tuma otro caminda pa percura cu por haya beneficionan secundario cu tin mes of mas peso cu aumento salarial directo.

Ta bon pa tene cuenta cu nos sistema di impuesto progresivo ta kita un gran parti di e aumento general di salario. Tambe e ta keda un efecto permanente di cadena den e compania mes, pues e costo pa opera e compania ta bira mas grandi. Esaki tin consecuencia no solamente pa e dunado di trabou sino pa e propio trahadonan tambe.

Beneficionan secundario

E ta haya cu tanto e dunado di trabou como e representantenan sindical mester ta creativo y bin cu splicacion bou e trahadonan pa nan compronde cu ta preferibel pa bon cu un cantidad di beneficio secundario cu tin mesun forsa y balor, te hasta mas balor cu e aumento salarial.

“Ya cu nos a custumbra pa añanan largo cu e aumento di salario directo ta e punto mas importante. Esey ta haci e tarea di e dirigente sindical dificil pa motibo cu e trahadonan no ta wordo splica of convenci facilmente cu e beneficio secundario tin e mesun balor ”, e di.

Un beneficio secundario lo por cumpra seguro priva pa e trahado y su famia pa gastonan cu un seguro general manera AZV no ta cubri. E ta haya cu AZV ta un tremendo seguro general cu nos pais tin y cu hopi pais di mundo no tin. Pero e ta un seguro basico, pues nan tin cierto areanan cu nan no tin cobertura riba nan. Pa ehempel ki pakete nan por cumpra pa bo yiu cu ta bay scol. Tambe con leu e trahado por haya cobertura pa e gasto escolar cu ta un gasto grandi pa basta famia na Aruba, entre otro transportacion.

Pa algo asina por tuma luga, e mediador di gobierno ta haya ‘cu mester tin un discusion entre e sector di dunado di trabou y sindicato’ pa atende e situacion aworaki. Ya cu ta evidente -segun sr. Pontilius- cu e costo pa haci negoshi ta bay bira mas caro. “Tampoco Aruba no ta niun excepcion si nos ta tene cuenta cu e aumento di combustibel rond mundo. Esaki kiermen cu nos por haya nos mes cu aumento di prijs di gasolin frecuentemente, locual tin su efecto riba costo di bida diario.”