MFA Noord ta escenario di un exposicion masha singular y interesante di popchinan di antes elabora pa e miembronan di e grupo Unie di Noord. E expo aki cu a wordo habri pa publico diahuebs ultimo ta exhibi e trabou creativo y bunita di un grupo di dama di e tercera edad. Grupo Unie a wordo funda na 1978 pa asina dama 60 plus por comparti hunto realisando actividadnan social y cultura.

E ta un expo yen di nostalgia di un epoca cu a bay y cu no ta bin bek mas, pero tambe e ta un expo cu ta trece un reflexion pa e generacion nobo pa nan wak con creativo e generacion di antes tabata ta pa nan recrea nan mes, tempo cu no tabatin game boy ni smartphone.

Nan ta alrededor di 29 popchinan traha cu hopi detaye y amor. Edna Sevinger ta coordinador di grupo Unie cu ta consisti di 26 miembro. Nan ta reuni regularmente cada pasa un diaranson na Centro di Bario Noord. El a bisa cu Titi Tromp cu ta otro coordinador di e grupo aki a bin cu e idea aki pa tur miembro traha un popchi di paña di antes. Ora cu nan a bin cu e proposicion aki nan miembronan a acept’e di biaha cu hopi emocion. “E tabata un experiencia masha bunita pa mi mes”, sra. Sevinger a bisa na Bon Dia Aruba.

Popchinan y historia
Cada popchi tin su propio historia. Benita Tromp kende tin 20 aña como miembro di e grupo aki y el a traha un popchi di e mesun forma y estilo di un popchi cu su mama a traha pe ora cu e tabata un mucha muhe di apenas 4 aña na aña 1940. “Esey tabata e popchi cu ma hunga cu ne. Ma cose su bistinan y door di esey mi a siña cose”, asina yen di nostalgia sra. Tromp a bisa.

El a bisa cu a traha e popchi aki mescos cu su mama. E bisti e no a pone nada di hilo djis, ya cu asina su mama tabata hacie. Pa sigui cu e tradicion aki, ora cu sra. Tromp a casa el a traha popchi di antes pa su yiunan muhe tambe. Segun sra. Tromp e no ta dificil pa traha un popchi, si bo ta custumbra bo ta trahe. E ta recorda cu popchi tabata e cos di hunga di e muchanan muhe di antes, pero tabatin otro diversion tambe. E trahamento aki di popchi a trece hopi recuerdo di su infancia pe, pero tambe recuerdonan inolvidabel hunto cu su mama den seno di nan famia na Turibana.

MFA Noord y expo
Richard Tromp kende ta manager di MFA Noord a expresa su satisfaccion cu e tipo di exposicion aki por ta tumando luga den nan instalacionnan. “Nos di MFA ta hopi sorprendi y contento di e bunitesa y di e detayenan di e popchinan”, el a bisa.

El a bisa cu den pasado nan a yega di organisa diferente actividad pa grupo Unie integra pa damanan grandi di Noord. Otro aña na maart e grupo aki ta celebra 40 aña di existencia. Den cuadro di e celebracion aki nan ta bay organisa cada luna diferente actividad y e prome di nan ta e expo di popchinan di antes. E ideanan a bin di e coordinadornan di proyectonan cu nan mes ta eligi cada aña.

E ta relata cu hopi di e personanan aki ta bin for di famianan humilde di Noord hopi aña atras, y nan mes mester traha nan popchinan. Nan tabata hopi creativo of nan mamanan tabata traha e popchinan. “Nan a purba di capta e esencia di e popchinan cu nan tabata traha cu ne, y traha nan di tempo di nan infancia”.


E ta haya cu e expo aki ta trece hopi alegria den MFA Noord. Nan ta diferente tipo di popchi. Tin algun grandi y otronan mas chikito. Tin popchi cu ta parce e otro miembronan. Tin popchi cu ta refleha con nan tabata ta temponan di antes. Tin popchi luhoso y otronan cu ta mas humilde, etc.. E popchinan aki tambe ta refleha e emocion di e persona cu a trahe tambe.

Mirando e facilidad di MFA Noord y e bishita di hopi publico, nan a dicidi di organisa e expo aki den nan sala. E expo aki ta keda habri den orario di servicio di MFA Noord , y aunke e tabata programa pa un luna di exposicion so, nan a dicidi di mantene esaki te fin di december pa asina muchanan di scol pero publico en general por disfruta di dje.