Benny Nisbet (PPA): ‘Crisis financiero y mega debe no por wordo salba cu medida so!’

2018 ta yegando su final mientras 2019 ta den porta! Partido PPA tin nos puntonan riba cual nos ta cuestiona e maneho di nos actual gobierno di MEPORED.

Na prome luga, nos ta lamenta cu ainda ta existi e mentalidad politico pober, cu si un contrincante cuestiona gobierno su maneho, e contrincante lo mester ta totalmente contra e gobierno. Esaki ta demostra cu nos democracia Arubano no a crece segun aña a pasa. PPA a duna nos actual gobierno tur espacio pa implementa nan maneho, pero PPA a cuestiona ora nos ta sinti e falta di un vision profundo riba cualkier tereno, specialmente tereno cu lo afecta nos pueblo seriamente. Entre otro, riba tereno di nos economia, nos turismo, nos salud publico riba e situacion di San Nicolas, riba tereno di ‘climate change & rising sea levels’ etc.

PPA ta desea di cera y habri aña cu e ponencia aki: “E crisis financiero y e mega debe no por wordo soluciona basa riba un maneho di medida so. Ta necesario un maneho economico cu ta stimula inversion y ta crea cupo di trabou!”

Y ta esey ta hustamente locual PPA a haya falta cu e maneho economico di nos gobierno actual. A dura un aña henter pa nos flamante ministro di economia determina y proyecta un maneho economico. Por fin, un aña despues cu e gobierno ta na mando, a bin tene un 6 tereno cu e actual gobierno lo proyecta.

Awor e ausencia di un maneho economico dentro di e prome 100 dia di gobernacion no ta solamente falta di nos ministro encarga cu economia… e ta sinta den e decisionnan cu lo forma e ministerionan y dentro di un crisis financiero enorme, cu MEP como oposicion oficial durante 8 aña mester tabata consciente di e embergadura di nos crisis, y cu e combinacion di un ministerio di finanzas y economia lo ta algo bastante dificil pa maneha. Durante aña 2018, PPA a observa bastante tempo y energia inverti den un maneho financiero, y esaki bou di wowonan critico di e CAFT, cu a wordo cuestiona como trapamento di nos autonomia como pais den Reino Hulandes pa MEP; pero awor cu MEP y su coalicion por a pone un final na e tarea di CAFT, MEP a dicidi di prolonga e presencia di CAFT y asina a prolonga e trapamento di e autonomia di pais Aruba. Biniendo bek na e ponencia di PPA cu e solucion pa e crisis financiero no ta sinta den un maneho di medida, pero ta sinta mas bien den un maneho economico dinamico, unda via di un vision hopi cla ta stimula inversionista pa inverti den nos pais…y esaki segun PPA falta ten a e momento aki.

Falta un vision pa un di dos y di tres pilar economico!

E realidad amargo, segun PPA, ta cu nos actual gobierno tambe a pretende cu ta nan a logra cu nos ex gobierno por a negocia un acuerdo cu CITGO/PDVSA, y grandemente pa e motibo aki nan no por a vota contra un contract cu tin Aruba mara, y ta mustra cu Aruba ta perdiendo varios aña prome cu por deshaci di un contract cu por wordo compara cu un ‘knopi Goridano’. Ta un realidad cu e proyectonan mas grandi cu ta wordo ehecuta, of ta den preparacion pa wordo ehecuta, ta vision y proyecto di e gobierno anterior, y te ainda no por a determina ni mira ningun vision of proyecto cu lo ta di nos gobierno actual; y esaki ta di lamenta, pasobra tin tres (3) partido ta forma parti di e gobierno actual.

E proyectonan mas grandi cu PPA ta referi na dje ta:

  1. Watty Vos boulevard
  2. Proyecto di reconstruccion edificio di JFK
  3. Proyecto renobacion di nos aeropuerto
  4. Proyecto di un Port City riba ex tereno di Containerhaven y ex Free Zone.

Ningun ta hiba nos den direccion di un di dos of di tres pilar economico.

E terenonan unda nos actual gobierno lo dedica atencion tampoco ta duna impresion di hiba nos pais den direccion di mas pilar economico. Y ora bo no crea un pilar economico, ta e mesun fondo cu e unico pilar economico a crea durante añanan ta wordo reparti y reparti den pueblo y den proyectonan chikito, cu kisas ta yuda, pero no tin e impacto economico cu nos pueblo mester di dje.

E mas tristo ta cu nos actual gobierno di MEPORED no ta dispuesto pa a compara otro vision y proyecto y evalua nan impacto den nos economia Arubano. Berdad si bo mes no tin vision, uza vision di otro, pero no busca pa salba nos pais basa riba medida so en bes di un maneho economico dinamico… y esey falta seriamente.

Por ehempel, ta wordo bisa cu lo implementa un moratorio riba mas construccion di hotel, condominio, apartamento, etc. Pero ta aproba e vision/proyecto cu a inicia bou di gobierno anterior di AVP, esta un Port City den cual e curason di dje lo ta mas hotel, condominio y apartamento di un nivel halto y cu por wordo considera un ‘smart city’. Fuera di esey, mayoria di cupo di trabou cu un Port City ta produci ta sinta den e.o. siguridad, limpieza y unda tin negoshi, bendedora. PPA su pregunta ta: Cuanto cupo di trabou di balor, esta cu ta paga un salario di nivel, un Port City lo produci?

PPA ta keda di opinion cu e tereno di mas balor riba nos isla unda tabata tin un Containerhaven y ex Free Zone mester wordo uza pa:

  1. Expansion di e sitionan pa nos turismo di crucero y e infrastructura necesario.
  2. Construccion di un eventual Aruba World Trade Center, combina cu un Universidad Internacional, cual lo crea bastante cupo di trabou di nivel y relativamente bon paga pa nos hobennan cu ta termina un estudio academico y HBO, etc.

Ta un lastima cu nos actual gobierno no a ni evalua e pensamento aki, cu lo por hiba Aruba den direccion di un di dos pilar economico, esta ‘Nos servicio na sostene Internacional Trade y crea un sector di conocemento mas amplio riba nos Isla’ cual ta expansion di nos ‘celebro’ presente riba nos isla.

Nos producto di turismo mester wordo diversifica:

Pa nos pais Aruba por mantene nos posicion dentro di e competencia di Caribe, PPA ta di opinion cu Aruba lo mester ‘diversifica’ nos producto di turismo. Nos no mester keda pensa cu uzando e formula di e ultimo 60 aña, cu esaki lo mantene nos nivel di turismo pa e siguiente 40 pa 50 aña.

PPA tin añanan ta proyecta e necesidad pa gobiernonan dedica atencion na:

  1. MCI esta Convention tourism! Cu tur nos ponencia cu nos ta papia 4 pa 5 idioma, te na e momento aki, varios gobierno geel y berde no a scoge pa dedica atencion na e alternativo aki.
  2. Haci un Aruba un ‘Golfer’s destination’ esta door di construi un Icampo di golf internacional, p.e. na Seroe Colorado, cual lo contribui pa Aruba por ricibi mas turista di nivel, pero nada ainda!
  3. Desde 2005, PPA ta e prome y unico partido politico cu a proyecta aña tras di aña e posibilidad di desaroyo ‘Health & Wellness Tourism’, tambe conoci como turismo medico. Por fin nos a tende e actual ministro di turismo D. Oduber habri cierto posibilidad pa esaki. PPA ta spera cu e hecho cu turismo y salud publico ta cay bou di su persona, cu esaki lo por bira posibel den futuro, creando cupo di trabou di nivel tanto riba tereno di turismo como di salud publico.
  4. PPA a proyecta e desaroyo di San Nicolas como ‘San Nicolas: Our Caribbean Town’, pero masha poco atencion ta wordo dedica na desaroyo di un vision completo di esaki.

Conclusion ta cu e maneho economico di nos actual gobierno di MEPORED a laga hopi di desea durante di 2018. PPA ta spera cu 2019 lo ta diferente, y cu nos lo por mira realmente e atencion di nos gobierno pa un desaroyo economico fuerte y duradero diversificando nos economia y diversificando nos turismo.

En todo caso…un feliz aña pa henter nos pueblo y exito na nos gobierno y parlamento.

You May Also Like

PPA su masterplan pa desaroyo di Oranjestad lo ehecuta maneho y proyecto ‘strategico’

E actual gobierno di AVP a haci Oranjestad ‘prioridad number uno’ di su maneho ...

Lansamento oficial di partido politico nobo Raiz

  Den e ultimo dos luna, nos por a tuma nota di e partido ...

Parlamentario Alan Howell (POR): Protocol firma pa ministernan di Husticia y Transporte lo yuda screening

ORANJESTAD – Parlamentario Alan Howell, comentando riba e situacion di Venezuela, a indica cu ...

Parlamentario Mike de Meza(MEP): Prome Minister ta bon na altura di retiro di directornan di companianan

ORANJESTAD – Gabinete MEP-POR-RED tin un maneho di persecucion politico, implementa medida contra pueblo ...

‘Minister Oduber ta traha plataforma pa persigui mas hende politicamente’

No cabe duda, Minister Oduber ta un personahe di carnaval y ayera el a ...