Informacion cu tabata circula riba rednan social ayera ta indica cu ex-minister Benny Sevinger y comerciante Pieter Susebeek a presenta nan mes na autoridadnan pa cuminsa sinta nan castigonan di prison liga na e caso di corupcion “Avestruz” despues di e sentencia di Hoge Raad.
Segun informacion publica riba diferente pagina di Facebook, ambos homber a raporta ayera mainta pa cuminsa sinta nan castigo imponi pa corte. E desaroyo aki ta e ultimo un fase den un caso cu a dura hopi aña den sistema hudicial, y cu a yega na un decision final mas trempan na 2026 despues di agota apelacionnan.
Detayenan tocante e proceso exacto di nan entrega no ta completamente cla. Varios informe comparti online a sugeri relatonan diferente di unda e hombernan a presenta nan mes pa prome biaha, cu algun ta indica cu nan presenta na KIA mes, mientras otro nan ta menciona cu nan entrega nan mes na Warda di Polis na San Nicolas pa proceduranan preliminar prome cu nan traslado pa KIA.
Bon Dia Aruba a manda pregunta pa abogado di Sevinger pa confirma si e informacion ta corecto y unda e condenadonan a presenta pa cuminsa sinta nan castigo. Te na ora di cierre di nos edicion no a ricibi respuesta.
E caso ta draai rond di e alocacion ilegal di tereno publico entre 2014 y 2017. Sevinger, kende a fungi como minister di infrastructura y desaroyo espacial durante e periodo ey, a ricibi un castigo di 48 luna di prison, di cual 12 luna ta condicional, cu un periodo di prueba di tres aña. Ademas, pa un periodo di seis aña despues cu e cumpli su castigo, e no lo por traha den gobierno ni participa den eleccion como candidato politico. Tambe e tin obligacion di paga back casi 800 mil florin, un suma cu el a gasta sin por a demostra con el a haya e placa aki.
Susebeek a ser sentencia na 30 luna di prison, di cual 10 ta condicional, hunto cu e confiscacion di fondonan significante mara na e caso.
