Home Local Benta di Ling & Sons a stroba un poco proceso pa negosha...

Benta di Ling & Sons a stroba un poco proceso pa negosha CAO

550

E benta di Ling & Sons a tuma luga na momento cu sindicato FTA tabata den proceso di negosha un contracto colectivo (CAO) nobo pa e trahadonan di e supermercado aki cu recientemente a conoce un doño nobo.

Ta asina cu e magnate Hulandes, Gerard van den Tweel a bende su inversionnan den forma di supermercadonan na Corsou, Boneiro y Aruba, di cual Ling & Sons tabata un di nan. E grupo di Jamaica encabesa pa e inversionista Gassan Azan a cumpra mayoria di accion den e compania di Van den Tweel. Presidente di FTA, Hubert Dirksz a declara na Bon Dia Aruba cu ta normal cu un compania por bende su accionnan, pero esaki ta tuma net na momento cu nan ta negoshando un CAO nobo.

Derechonan di trahadonan ta garantisa
E benta aki por stroba un poco e proceso pa yega na un CAO nobo. Pero awor cu ta conoci un doño nobo di Ling and Sons, e sindicato ta spera di sinta cu nan representante na mesa unabes cu nan ta drenta den e compania pa asina negosha e proposicion cu FTA tin na beneficio di e trahadonan.

Nos ta papiando di un grupo di alrededor di 120 trahadonan, mayoria di nan, kiermen mas cu 100 ta miembro di FTA. E sindicalista ta bisa cu e trahadonan mester ta trankilo, ya cu tur derecho cu nan a adkiri caba ta keda normal. “Nada ta bay pasa…. E derecho di trahadonan ta keda, nada ta cambia”, el a bisa na e matutino aki.

Aworaki e proceso di negociacion di e CAO, nan tin’e wanta pasobra nan a pidi e sindicato pa termina cu e trabounan ora cu e accionista nobo ta tuma over e negoshi aki. Ya esaki practicamente a sosode y awor FTA kier bay mesa, y esaki mester tuma luga den e siman cu ta bin. Te ainda FTA no a cera conoci cu e inversionista nobo, pero si nan sa cu e ta na Aruba segun informacion cu a yega cerca e sindicato.

E sindicalista Dirksz a agrega cu e director di Ling & Sons cu ta atende cu e negoshi, FTA tin combersacion regularmente cu ne, y solamente ta falta palabra e fecha pa sinta na mesa y negosha e CAO nobo.

Segun FTA, e preocupacion di e trahadonan tabata ta cu e negoshi a yega di cay un poco, pero despues a lanta bek, locual e sindicato ta haya positivo. Otro preocupacion ta cu hopi compania y no Ling & Sons so, ta trahando mas tanto cu hendenan via contracto, y esey ta algo cu mester wordo regula miho, segun e sindicalista. Si esaki ta bon regula y e trahadonan ta consciente pa entrega nan keho sea cerca departamento di labor of na sindicato, FTA lo sa di atende cu e situacion aki. Nan mester atende cu e asunto aki como sindicalista pa coregi e fayo cu ta presenta door di e dunado di trabou.

Di otro banda segun fuente online Curacaonieuws.nu, sr. Van den Tweel a yega di comenta cu nada lo cambia pa personal y tampoco pa e productonan y marca. Lo keda bende entre otro productonan for di Albert Heijn.