Pashentnan disgusta pa motibo cu ta yama pa pidi afspraak, ta haya pa cierto ora anto ta wordo atendi te despues di casi 2 ora.

No ta solamente dificil pa haya afspraak cerca dokter di cas pero tambe manera bo haya afspraak, no ta cumpli cu ora; esaki ta un percepcion cu varios persona den comunidad tin. “Un cos ta warda 15 minuut pero absolutamente un abuso pa warda casi dos ora largo pa dokter atende cu mi problema di salud”, a comenta na Bon Dia Aruba.

Mayoria di pashentnan cu tabata duna nan keho ta personanan di edad mas avansa. Nan ta bisa cu no tur ora nan tin auto pa yega dokter, nan yiu of nieto ta hiba nan anto no tin tempo pa keda warda mas di un ora.

Tambe tin esunnan cu ta bay cu bus anto no tur ora nan ta haya bus facil pa bay bek cas. Despues di esaki tambe ta un frustracion grandi cu tin cu warda na botica pa haya remedi. Asina pashent a comparti nan keho.

“Locual por bisa si ta cu AZV hunto cu asociacion di dokter nan di cas tin un palabracion haci pa locual cu ta pashentnan cu ora nan yama pa haci afspraak, si nan haya un ora pa nan bin, ta asina cu dokter di cas lo purba pa mantene su mes na e orario”, vocero di AZV Solange Tchong ta splica.

Tin ora tin caso cu consulta lo dura pa motibo cu e ta rekeri mas tempo of mas atencion di e dokter di cas e ora e consulta ta dura mas. E ta algo cu por sosode cerca tur dokter di cas of specialista. E dokter por ehempel por dicidi di haci un examinacion mas profundo, locual ta haci e schedule di otro pashent ta cambia. Tin situacion tambe manera den caso di specialista tin afspraak un cierto ora pero si a sali un emergencia e momento e ora tambe bo ta haya cu mester warda pa specialista bay bin bek.

“Nos a pidi e asociacion di dokter nan di cas y nan tambe a contribui na esaki, of nan a bisa cu nan lo contribui mas hopi cu por. Ta hustamente traha mas segun un schedule. Cu nan ta purba di consulta mas pashent posibel. Ora cu cos bay manera plania pero door cu ta malesa di hende bo ta haya cu semper lo bay warda”, sra. Tchong ta sigui splica.

“Nan ta purba di tene na tur hende nan circunstancia pero no tur ora e ta logra. Dokter a huramenta pa scapa bida di hende y pa yuda pashent, bo ta haya cu nan tin cu evalua e momento ey den escogencia di ta prefera pa duna e pashent un par minuut extra.”

“Tur caso ta diferente, tur enfermedad ta diferente. E ta dificil pa duna un solo contesta pa motibo cu nos no por generalisa. Nos ta purba pa trece mehoracion.”

Bon Dia Aruba lo acerca asociacion di dokter pa nan punto di bista.