File -- In this Friday, Feb. 20, 2015 photo travellers leave a BVG subway train in Berlin, Germany. Berlin is unveiling a new app that will let people use public transport, rental bikes, car-sharing and taxis seamlessly to travel through the German capital. (Lukas Schulze/dpa via AP)

BERLIN (AP) — Biaheronan na Berlin pronto lo por uza un app unico pa cambia sin problema entre transporte publico, bais di huur, comparti auto y taxi, sin mester sign up pa cada servicio individualmente, oficialnan a bisa ayera.

Startup di Lithuania, Trafi, a bisa cu Berlin lo ta e prome capital mayor Europeo pa haya un app di transporte cu ta maneha cobro pa tur servicionan centralmente, y ta rekeri un login unico. Servicionan similar ya ta disponibel na Vilnius, Rio de Janeiro, y Jakarta.

E asina yama ‘deep integration apps’, cu ta elimina e fastidio di mester maneha varios proveedornan, ta wordo mira como importante pa ciudadnan purbando di preveni hende di congestiona caminda cu nan propio auto.

“Esaki ta bay precies den e direccion corecto”, segun Andreas Knie, un experto den mobilidad na e Social Science Center Berlin. “Servicionan di transporte mester ta conecta, manera rednan di celular, pa bo por pasa facilmente di un pa e otro.”

E sistema di transport di Berlin – un laberinto di liñanan underground, tram, bus, y trein – ta pasando dificultad mientras su poblacion ta alcansando cuater miyon.

E gobierno iskierdista di e capital a haya dificultad den añanan recien pa integra servicionan nobo – manera companianan di lift y comparti auto, bais y scooternan di huur – den e infrastructura existente, algun di cual ta data bek na siglo 19.

Knie tabata skeptico cu companianan grandi di transporte manera e compania publico BVG, di cual Berlin ta su doño y ta conta cu mas di un biyon di pasahero cada aña, lo ta dispuesto pa haci cualkier cos cu lo menasa su modelo di negoshi.

No a keda conoci inmediatamente si companianan mas chikito lo haya oportunidad igual den e app, incluyendo acceso na data ‘real-time’ valioso di con e clientenan ta move den e ciudad.

Dos compania grandi di comparti auto, car2go di Daimler y DriveNow di BMW, y e gigante di lift Uber, ta notoriamente ausente di e linea di comienso, maske mas di un dozijn di rivalnan chikito ya caba ta a bordo.

Trafi a bisa cu ta spera mas compania lo uni pa ora e app, yama Jelbi, wordo lansa e berano aki.