Oficina Central di Estadistica ta presenta e resultadonan principal di e Indice di Prijs di Consumo (CPI) pa luna di Juni 2022. Den esaki a destaca un aumento den e bestaansminimum como tambe un aumento den 44% di bienes y servicio cu ta compone e canasta di consumo.

Indice di Prijs di Consumo pa luna di Juni 2022

E CPI pa luna di Juni 2022 ta 103.26, loke ta representa un subida di 0.7% compara cu e indice di Mei 2022 (102.49) y acumulando un subida di 2.6% te cu na Juni di e aña aki. E cambio di e CPI pa e ultimo diesdos (12) luna (Juni 2021 te cu Juni 2022) ta 5.3%, un subida di 4.3 punto di porcentahe (ppt) compara cu e periodo corespondiente di aña pasa (1.0%).

E promedio anual (ultimo 24 luna) di e tasa di inflacion pa e periodonan di Juni 2020 te cu Juni 2021 y Juni 2021 te cu Juni 2022 ta 3.4%, un subida di 5.2 ppt compara cu e -1.8% registra den e periodonan di Juni 2019 te cu Juni 2020 y Juni 2020 te cu Juni 2021.

Durante e luna aki, shete (7) di e diesdos (12) sectornan a registra subida di prijs. E subidanan cu tabatin e mayor efecto riba e CPI a wordo registra pa e sectornan di “Transporte ” (4.5%), “Mobilario” (2.6%) y “Cuminda y bebida no-alcoholico” (1.2%), causando un efecto di 0.67, 0.24 y 0.13 ppt, respectivamente. E subidanan den e sectornan restante a contribui cu un efecto di 0.10 ppt riba e CPI di Juni 2022.

E subidanan aki a wordo contraresta parcialmente door di principalmente caida den e indicenan di e sectornan di “Paña y sapato” (-7.3%) y “Recreacion y cultura” (-1.6%) cu a contribui cu un efecto di respectivamente -0.19 y -0.15 ppt riba e CPI di Juni 2022. E caidanan den e sectornan restante a contribui cu un efecto di -0.05 ppt riba e CPI di Juni 2022. E subida den e sector di “Transporte” a wordo causa door di principalmente un subida den e categoria “Gasto relaciona cu uso di vehiculo di transporte personal” (6.9%), causando un efecto di 0.65 ppt. E subida den e sector di “Mobilario” a wordo causa principalmente door di un subida di 14.2% den e categoria “Mueble y accesorionan, tapijt y otro tipo di material pa vloer”, causando un efecto di 0.14 ppt. E subida den e sector di “Cuminda y bebida no-alcoholico” a wordo causa door di principalmente un subida den e categoria “Cuminda” (1.2%), causando un efecto di 0.12 ppt.

E caida den e sector di “Paña y sapato” a wordo causa principalmente door di un caida den e categoria “Paña” (-7.2%), causando un efecto di -0.15 ppt. E caida den e sector di “Recreacion y cultura” a wordo causa principalmente door di un caida di 2.8% den e categoria “Vacacion”, causando un efecto di -0.08 ppt.

Canasta di consumo

E canasta di consumo di e CPI ta consisti di 408 bienes y servicionan. Compara cu Mei 2022, 44.4% di e bienes y servicionan aki a conoce un aumento di prijs causando un efecto di 1.40 ppt, mientras cu 39.5% ta mustra un caida di prijs, cu a contribui cu un efecto di -0.65 ppt y pa e restante 16.2% no tabatin

cambio den prijs. Prijsnan di bienes a subi cu 1.3% y a causa un efecto di 0.75 ppt. Prijsnan di servicionan practicamente no a registra cambio y tabatin un efecto insignificante riba CPI di Juni 2022.

Core inflation

E CPIC (core inflation) – CPI excluyendo e efecto di energia y cuminda – a registra na Juni 2022 un subida di 2.0%. E indice di energia – cu ta consisti di e productonan: electricidad, awa, gasolin y diesel a registra un subida di 9.0%. E indice di cuminda a registra un subida di 5.1%.

Bestaansminimum

E bestaansminimum pa un hogar consistiendo di dos (2) adulto y dos (2) mucha (edad 0-14 aña) na Juni 2022 ta Afl. 5,070, un subida di Afl. 300 compara cu Juni 2021 (Afl. 4.770). E bestaansminimum pa un hogar di un (1) adulto ta Afl. 2,414, un subida di Afl. 143 compara cu Juni 2021 (Afl. 2.271).

Cambio di prijs di petroleo, utilidad, gasolin y diesel na Juni 2022

Prijs di utilidad (electricidad y awa), gasolin y diesel ta wordo determina primordialmente door di e prijs internacional di petroleo. Na Juni 2022 e prijs promedio pa bari di petroleo (US$ 115.29) a conoce un subida di US$ 5.98 (5.5%) compara cu Mei 2022 (US$ 109.31).

Prijs di electricidad y di awa no a cambia compara cu Mei 2022. Consecuentemente, e prijs promedio di electricidad pa vivienda a keda Afl. 240.09, mientras cu e prijs promedio di awa pa vivienda a keda Afl. 137.05.

Prijs di gasolin a registra un subida di Afl. 32.20 cent (11.1%) na Juni 2022 y a causa un efecto di 0.65 ppt riba e CPI. Prijs di diesel a registra un subida di Afl. 1.30 cent (0.4%) na Juni 2022 y a causa un efecto insignificante riba e CPI.

Na Juni 2022, utilidad, gasolin y diesel como grupo, tabatin un subida di prijs di 3.8% compara cu Mei 2022 y hunto tabatin un influencia di 0.65 ppt riba e CPI, mientras cu e restante 404 bienes y servicio hunto, a conoce un subida di prijs di 0.1% y tabatin efecto un efecto di 0.10 ppt riba e CPI.

LEAVE A REPLY

Please enter your comment!
Please enter your name here