Recientemente, CBS a publica Indice di Prijs di Consumo, y den esaki a destaca cu e bestaansminimum pa un hogar consistiendo di dos (2) adulto y dos (2) mucha (edad 0-15 aña) na September 2023 ta Afl. 5,428, un subida di Afl. 64 compara cu Augustus 2023 (Afl. 5.364). E bestaansminimum pa un hogar di un (1) adulto ta Afl. 2,585, un subida di Afl. 31 compara cu Augustus 2023 (Afl. 2,554). E aumento aki tabata causa principalmente pa aumento den prijs di cuminda y bebida no-alcoholico.

Kico ta un “Bestaansminimum” y con e ta wordo ahusta?
CBS ta defini un bestaansminimum como e nivel minimo di entrada cu ta wordo percibi necesario pa un persona of famia por funciona den sociedad di un manera adecuado y socialmente aceptabel. Ora nos usa e definicion “Bestaansminimum”, en realidad ta wordo referi na un “Sociaal Bestaansminimum” y no na e definicion literal di un “Bestaansminimum” cu ta referi na “e suma di placa necesario pa cumpra e bienes y servicionan cu ta wordo considera necesario pa biba un bida liber di privacionnan basico” (Nacionnan Uni).

Un indice a wordo crea pa e “Bestaansminimum” door di calcula e costo di tur recursonan esencial cu un adulto promedio ta consumi durante un luna. Cada luna e indice aki ta wordo ahusta, a base di e prijsnan di alimento, paña, vivienda, transporte y otro articulonan den e canasta. E bestaansminimum actual ta wordo basa riba e rapport “Bestaansminimum 2010” publica door di CBS na December 2010, y cual ta wordo actualisa mensualmente segun e CPI. E unidad di referencia usa door di CBS (manera indica den e rapport aki) ta di un hogar cu ta consisti di dos adulto y dos mucha (di 0 pa 14 aña).

Bestaansminimum na September 2023

E bestaansminimum ta e nivel minimo di entrada cual ta wordo percibi cu ta necesario pa logra mantene un nivel di bida adecuado den un cierto pais. Usualmente e bestaansminimum ta wordo determina door di calcula e gasto di tur e recursonan esencial cu un adulto ta consumi den un luna of aña. Generalmente esaki ta wordo yama un indice basico di necesidad, y e ta varia segun e prijs di cuminda, paña, vivienda, transporte y otro articulonan den e “canasta”.

Escalanan di ekivalencia ta wordo usa pa ahusta e nivel minimo di entrada percibi pa hogarnan di diferente tamaño y composicion. E escala ta asigna un peso di 1.0 pa e prome adulto y 0.5 pa cada adulto adicional den e hogar (edad 16+) y un peso di 0.3 pa cada mucha (edad 0- 15 aña). E bestaansminimum ta basa riba cifranan di e rapport “Bestaansminimum 2010” y ta wordo actualisa mensualmente pa cu inflacion usando e CPI mensual. E unidad di referencia den e rapport aki ta di un hogar cu ta consisti di dos (2) adulto y dos (2) mucha (edad 0-15 aña).

Na September 2023 e bestaansminimum mensual pa un hogar cu ta consisti di dos (2) adulto y dos (2) mucha (edad 0-15 aña) (Afl. 5,428) ta mustra un subida di Afl. 119 compara cu September 2022 (Afl. 5,309) y a wordo causa principalmente door di un subida di Afl. 96 den e sector di “Cuminda y bebida no-alcoholico”.

Na September 2023 e bestaansminimum mensual pa un hogar cu ta consisti di un solo adulto ta Afl. 2.585, cual ta representa un deficit di entrada di Afl 692, un caida di Afl. 21 compara cu e deficit observa un aña pasa (Afl. 713). E deficit aki ta e di dos mas halto registra den un periodo di seis (6) aña pa luna di September.

Riba e tabelnan adhunto por mira cuanto CBS ta calcula un famia mester pa cubri cierto necesidadnan. Igualmente por mira con un persona ganando salario minimo e aña aki ta core den deficit di casi 700 florin.