Diasabra 2 di april Aruba y mundo a celebra Dia Mundial di Conscientisacion d Autismo. En conexion cu e celebracion aki Gobierno di Aruba y Fundacion Autismo Aruba a organisa e evento “Light it up Blue” caminda a ilumina edificio di bestuurskantoor cu color blauw simbolisando asina apoyo pa e trabou di conscientisacion di autismo.

Durante e evento aki, Prome Minister di Aruba, Evelyn Wever-Croes a duna discurso caminda el a enfatisa e importancia di e fecha special y con Gobierno di Aruba ta apoya e lucha pa crea y aumenta mas conscientisacion pa loke ta trata autismo. “Pakico, pasobra nos ta convenci cu mas hendenan compronde kico autismo ta, mas tur hende ta mira e cualidadnan special cu un persona cu autismo tin, mas nos por duna un miho calidad di bida na tur esnan cu tin autismo na Aruba”, el a expresa.

Den su discurso Minitster President a ratifica cu e compromiso di gobierno ta bay mas leu cu solamente cende luznan blauw na bestuurskantoor. El a señala cy Nacionnan Uni den su reunion anual pa e dia di autismo lo toca e topico di enseñansa inclusivo y di calidad pa un y tur den contexto cu esaki ta wordo describi den e Sustainable Development Goals (SDG) #4.

El a subraya cu Gobierno di Aruba ta trahando den ekipo tambe cu expertonan den diferente ramo pa percura cu na Aruba tambe por yega na e realisacion di e SDG #4.

Minister President a resalta cu enseñansa ta un di e puntonan cu semper ta halto riba nan agenda y hunto cu nan partnernan den enseñansa nan ta trahando duro pa asina provee enseñansa di calidad y principalmente haci esaki mas inclusivo y accesibel pa tur persona cu ta biba na pais Aruba.

“E no ta un proceso facil”, el a indica recordando con e pandemia di Covid a trece retonan grandi den area di finanzas y consecuentemente den e area di enseñansa. Esaki como consecuencia a resulta den e ciere di scolnan rond mundo y aki na Aruba tambe, locual a causa un impacto hopi fuerte riba tur studiante y educadornan, pero mas ainda riba studiantenan cu tin mester di atencion special. “Banda di nos compromiso cu e SDG’s y e desaroyo continuo di nos pais y enseñansa, nos ta comprometi tambe pa crea un bon fundeshi pa inclusion”, el a expresa.

Minister Presidente a menciona tambe con Gobierno di Aruba ta sostene e proyecto di intervencion trempan pa muchanan cu ta sufri di entre otro autismo. E proyecto aki, el a splica, ta percura pa muchanan di un edad jong caba wordo evalua pa nan desaroyo y si mester pa nan ricibi tambe e apoyo cu nan tin mester den e areanan necesario pa asina por tin un desaroyo positivo.

El a remarca cu veld di enseñansa riba su mes ta constantemente den desaroyo cu tecnologia- y estudionan cientifico cu ta avansa continuamente. El a subraya cu Gobierno di Aruba ta tumando pasonan pa no solamente eleva e calidad y nivel di enseñansa na Aruba, pero hunto cu organisacionnan manera Fundacion Autismo Aruba y Nacionnan Uni, nan lo percura pa haci esaki accesibel y inclusivo, specialmente pa esnan den e spectrum di autismo.

Presidente di Fundacion Autismo Aruba, Carolina Thiel-Span, tambe a hiba palabra durante e celebracion special aki. Thiel-Span a cuminsa su discurso splicando kico autismo ta. Aunke el a remarca cu hopi persona tin algun conocemento ariba kico autismo ta, el a elabora un poco mas den detaye kico esaki ta.

Autismo, manera el a splica, ta conoci como ‘autism spectrum disorder’. Thiel-Span a enfatisa cu ta hopi importante pa bisa cu e ta un spectrum, ya cu tur persona ta completamente diferente. “Esaki ta hopi importante pasobra mi ta kere cu como hende nos ta gusta wanta nos mes na stereotiponan, por ta te hasta stigma, pa compronde cosnan”, el a indica

El a sigui subraya cu tambe ta importante pa realisa cu cada un, persona den e spectrum di autismo, ta un persona cu nan mesun necesidadnan, nan mesun cosnan cu nan kier yega na dje, nan potencial maximo cu nan por yega na dje y kico nan mester pa esaki.

Thiel-Span a señala cu e tema di inclusion ta uno hopi importante pa Fundacion Autismo Aruba y el a splica kico inclusion en realidad kiermen. “Inclusion ta nifica cu tur hende por participa den tur area di comunidad, sin laga niun hende afo sin importa ki habilidad nan tin, kico nan background ta, nan rasa of genero. Esaki kiermen cu nan por participa na tur cos manera sport, educacion, actividadnan social y te hasta yega un dia, mi ta spera, na tene un posicion manera di ministernan sinta awe ‘kinan”, el a splica.

El remarca cu inclusion ta rekeri tempo, su mesun luga, espacio, esfuerso y recursonan. Algo cu ta un trabou di ekipo cu como Fundacion Autismo Aruba nan no por haci esaki nan so, pa hiba y pusha e causa. “Pero nos mester cada un di boso aki presente y tur hende cu boso conoce pa yuda nos”, el a agrega.

Segun Thiel-Span a resalta, inclusion ta duna sentimento na personanan cu no ta sinti nan mes inclui pa ta parti di comunidad. Un cultura inclusivo, el a sigui splica, ta laga un hende sinti respeta y balora pa ken nan ta como persona, sin importa atrobe habilidadnan, y inclusion den comunidad ta brinda oportunidad pa tur persona biba miho

El a agrega cu hopi biaha un persona ta warda pa ago bati na su mesun porta pa worry cune. Pero e realidad, segun el a sigui bisa, ta cu na momento cu un persona scoge pa bienestar di tur hende, e persona ey y tur otro ta hibando e comunidad pa dilanti, “pues e ta bay beneficia nos tur y mi kier pa nos tur corda esaki awe y tur dia”.

Como presidnete di Fundacion Autismo Aruba, Thiel-Span a gradici cada persona presente pa forma parti di e lucha pa conscientisacion di Autismo, como mayor, familiar, amistad, pero tambe como persona den e spectrum cu tur dia ta lanta y bringa pa nan derechonan.

Por ultimo, Thiel-Span a referi na un quote cu el a lesa algun dia atras cu a yama su atencion: “You have to act as if it were possible to radically transform the world and you have do it all the time. Tin ora mi sa cu mayornan, sigur mayornan, ta sinti cu nan ta cansa, manera un cos cu nan ta bringa, bringa, bringa y cosnan no ta bay dilanti. Mi kier pa nos corda cu aunke cu cosnan ta mustra hopi dificil y cu e ta hopi cansancio, nos tin cu haci esaki tur dia y kies pa haci esaki tur dia. Sin cu nos sa na caminda nos ta crea efecto domino y nos ta motiva otronan pa haci esaki”, el a expresa.

LEAVE A REPLY

Please enter your comment!
Please enter your name here