No mester tin frontera pa haya informacion

“No mester tin frontera pa haya informacion. Bo mester por sigui duna e accesibilidad na esaki”, directora di Biblioteca Nacional, Astrid Britten ta expresa na Bon Dia. Esaki el a expresa den cuadro di digitalisacion di nan archief Arubiana, cual ta un prioridad hopi halto pa biblioteca na momentonan aki.

Biblioteca Nacional tin un coleccion yama Arubiana manera conoci cual ta nan coleccion nacional. Tur publicacion cu sali skirbi pa un Arubano of tocante Aruba, ta keda warda pa generacionnan cu mester bin. Akinan tin henter un trabao andando den e parti di digitalisacion. Biblioteca kier digitalisa e coleccion pa por pone esaki na disponibilidad di no solamente comunidad di Aruba, pero cualkier hende kisas cu ta biba afo y por drenta e sistema pa wak kico nos por tin. No solamente departamento di Arubiana, pero tambe nan tin hopi materialnan audio/visual cu nan tambe kier haci digitalisacion di dje.

Britten: “A traves di algun aña nos a forma henter un coleccion pa graba ora cu tin presentacionnan na biblioteca. Esakinan tambe ta un fuente di informacion masha importante mes cu nos tin den nos coleccion. Anto mi ta bisa cu coleccion tin su balor na momento cu bo ta haci e accesibel, cu tur hende por tuma nota di dje. Un coleccion warda cualkier caminda den un caha di sapato, pa ken e ta si ningun hende no por tuma nota di dje.”

E directora ta bisa nos cu nan a haci diferente biahe di trabao na entre otro na un instituto na Hulanda. Esaki ta algo cu nan ta trahando hopi activo riba dje cual lo bay refleha tambe den nan beleidsnota cu nan ta haciendo pa minister; pa indica e caminda cu nan kier cana y kico nan kier yega na dje.

Uzo di biblioteca ta mas extenso
Por lo general, e ta un trend mundial cu prestamento di buki y material di lesa cu esaki a baha drasticamente. Tumando nota di e medionan nobo, mas y mas e buscamento di informacion ta bira mas grandi. “Aunke cu tin un peliger na dje tambe pasobra tin masha hopi fake news ta bin tambe al caso cu tur e desaroyonan aki y ta bon pa tene cuenta cu esey”, sra. Britten ta splica.

P’esey e ta kere cu e parti di e desaroyo tecnologico/digital no por lag’e afo. Pero si bo ta mira cu kisas como un refleho prestamento di buki ta menos, pero manera nos a trece dilanti caba, segun sra. Britten e uzo di e biblioteca como luga ta hopi mas extenso. “Pa principalmente studiantenan cu despues cu scol caba nan ta bin akinan pa haci uzo di e facilidad cu nos ta brinda. Y tambe uzonan di computer ta hopi mas grandi.”

Kisas buki no den e forma fisico pero si den e forma digital ta keda riba e atencion di e muchanan. No por keda atras, pero biblioteca ta laga sa cu nan tin un tarea tambe den locual ta trata e informacion cu wordo busca, pa esaki wordo haci den un manera responsabel pa e muchanan.

Actividadnan
Na Biblioteca tin varios charla, lectura, presentacionnan di buki y un scala grandi di actividadnan educativo y cultural cu ta wordo haci na un biblioteca. “P’esey nos ta para pe tambe manera nos actividadnan di merdia unda bo ta purba di tur manera tambe pa curasha muchanan pa sigui mustra nan riba e importancia di lesamento.” E actividadnan anual manera e green education symposium, festival di buki pa mucha y otronan manera lesamento na casnan di anciano ta tur locual bo por ofrece na comunidad di Aruba como un biblioteca, y esaki ta algo cu ta sigui desaroya.

Lesamento: Factor hopi importante
Ora cu hobennan subi riba internet nan ta haya un escala grandi di informacion, pero e idea ta pa por distingui di informacion confiabel cu su fuente di credibilidad. Esaki ta un desaroyo mundial segun sra. Britten ta subraya pero e lesamento ta keda un factor hopi importante. “Y tambe pa por guia y motiva cu e mucha mester sigui lesa. Pasobra si bo no haci esaki bo ta cay atras sea bo ta lesa den forma fisico of digital, ta lesa bo tin cu lesa. Mundialmente nan a cuminsa tambe pa ofrece bukinan digital y hopi personanan cu tin nan diferente obhetonan ta download nan y lesa riba dje.”

Biblioteca Nacional no por ofrece e parti di buki digital ainda door cu nan tin un problema cu un sistema. Na momento cu esaki keda cla nan lo por bay over na cuminsa cu e sistema nobo aki, cual nan ta trahando riba dje. Pa e biblioteca, esaki ta algo cu mester a sosode ayera, pero tur cos tin u proceso pa cana, segun sra. Britten.

Parti financiero
Si huurmento di buki a baha, nos a puntra sra. Britten con esaki ta afectando nan financieramente y kico lo bira e futuro di bukinan fisico mirando cu nan ta wordo menos uza cada pasa tanto tempo. Sra. Britten ta contesta nos cu: “Bo tin cu wak e manera un manera di complementa otro. Tin bukinan cu ta keda wordo ofreci na forma fisico pero tambe awo digital. E ta tur dos. Den e caminda ey toch nos ta sigui. Hopi hende ta pensa cu si bay digital no lo tin buki na biblioteca mas pero te ainda esaki no ta e caso.”

Mescos ora cu banconan a cuminsa introduci E-Banking, hopi hende a kere cu no lo tin papel di statement mas, mientras cu esaki tampoco ta e caso actualmente. “Bo mester wak tambe locual bo ta haya y cu si bo por cumpli cu demanda di cual publico ta pidi. Pues si ta den e bukinan cu ta keda bini den e forma fisico, naturalmente bo ta bay riba dje. Manera bo no ta mira Encyclopedia mas. Antes bo ta haya tur e cosnan eynan y eseynan si ta full digital.”