???????????????

(AP) – President Joe biden a bisa riba diaranson cu su administracion ta enfoca “intensamente” riba reduci e costonan di cuido di salud y a señala republicanonan “MAGA” kendenan a bisa cu nan ta dicidi na reduci cobertura di Medicare pa miyones di Mericano.

Biden a haci uso di un speech na Las Vegas unda e tabata clausurando un bishita di 3 dia pa trece e punto aki dilanti. Tin varios diferencia den con e democratanan ta lidiando cu e prijsnan den aumento di prijs di medicamento compara cue coleganan Republicano. E president a busca manera di marca e contraste mientras e ta prepara pa anuncia un reeleccion. E speech cu el a duna riba diaranson na Las Vegas por ser mira como un adelanto di e campaña binidero mientras Biden ta purba pone e reduccion di prijs di medicamento den e centro di su politica y agenda politico.

Biden, papiando dilanti un audiencia di dokternan y enfermeronan na University of Nevada, Las Vegas, a priminti cu e lo proteha Medicare y Social Securiy, mientras cu tambe e tabata elogia su administracion su esfuersonan exitoso di pone presion riba companianan farmaceutico pa reduci costo di insulina pa Mericanonan cu ta sufri di diabetes.

“Republicanonan ‘MAGA’ den Congreso ta pensa cu tur esaki ta un mal idea,” Biden a splica. “Nan ta pensa cu farmaceuticonan mester por genera un ganashi grandi riba lomba di pueblo Mericano.”

E Cas Blanco ta pensa cu e tin un mensahe gañado den ilustra su legislacion cu a keda aproba aña pasa y cu awo ta premira di spaar biyones di dollar pa pueblo cu ta paga impuesto y reduci e costo di medicamento pa mas o menos 84 miyon Mericano cu ta depende riba Medicare.

E legislacion existente ta pone un maximo na e prijs di insulina na 35 dollar pa Mericanonan di edad mas halto y cu ta depende solamente riba Medicare.

Biden a propone extende e maximo aki na tur Mericano, sinembargo e plan aki te ainda mester gana e bataya. Esfuersonan pa aproba leynan cu ta pone un suma maximo riba e prijs di insulina pa Mericanonan cu no ta sigura of esunnan cu un seguro priva a fracasa den un Congreso controla pa democratanan aña pasa.

Biden, sinembargo, a sigui elogia e proposicion aki como un exito pa e miyones di Mericano cu no ta den Medicare. Companianan di medicamento, enfentando presion publico despues di a aumenta nan prijsnan pa e medicamento durante e ultimo decada, a cuminsa boluntariamente reduci e prijs di insulina. Fabricante di medicamento Novo Nordisk a anuncia diamars cu nan lo corta e costo di insulina na mas o menos 72 dollar, cual ta biniendo prome cu un anuncio di rival Eli Lilly ken a anuncia cu nan lo cuminsa bende insulina generico pa 25 dollar.

“Esaki ta agrega na un progreso grandi cu nos a haci aña pasa ora cu mi a firma e ley pa maximalisa e prijs di insulina na 35 dollar pa adultonan mayor,” Biden a bisa den un declaracion diamars. “Mi ta urgi tur otro fabricante pa sigui e moda aki y na Republicanonan den Congreso pa uni nos y pone e prijs maximo di insulina na 35 dollar pa tur Mericano.”