E famoso beisbolista David Ortiz, miho conoci manera “Big Papi” a wordo tira ayera anochi den e Club ‘Dial Bar and Lounge’. Banda di Ortiz, dos otro persona tambe a resulta herida. Un di nan ta e host di television Jhoel López, kende a haya un bala na su pia. E otro victima no a ser identifica.

Director di e Cuerpo Policial Nacional di Republica Dominicana Ney Aldrin Bautista Almonte a raporta na medioan cu tabata rond di 9’or di anochi ora cu diripiente un homber riba un brommer a baha y a bay directamente riba Ortiz, tirando e di cerca na su lomba. Esnan presente a logra di gara e homber, di kende su identidad ainda no ta conoci y a dun’e un bati. No ta conoci ainda si Ortiz tabata su obhetivo. Despues di haya atencion medico pa e heridanan cu el a ricibi, e homber lo ser interoga pa polis.

Mientras tanto Big Papi, kende a ser hiba na e clinica Abel Gonzalez, a wordo opera y su condicion ta stabiel. E tata di Ortiz, Leo, a duna un declaracion breve na e medionan presente, indicando cu su yiu ta for di peliger y cu ningun organo mayor a haya daño. E homber ta bisa di no ta compronde pa ki motibo un hende lo kier a tira su yiu. “Big Papi lo t’ey cu nos pa hopi tempo”, Leo a comenta.

E ekipo di Boston Red Sox, pa ken Ortiz a hunga mayoria parti di su carera, a wordo notifica door di e famia di Big Papi di e incidente. E ekipo a ofrece famia Ortiz tur asistencia necesario cu Big Papi tin mester pa su recuperacion y lo sigui tene na mente y curason.

LEAVE A REPLY

Please enter your comment!
Please enter your name here