Ministerio di husticia actualmente ta mirando restauracion di proyectonan anterior cu a wordo benta afo of cu no a wordo ehecuta te na final. Tambe Cuerpo Policial lo por obtene autoridad bek a base di articulo 33 di LTU si e cambionan necesario tuma luga.

Durante un conferencia di prensa ayera atardi minister di husticia Andin Bikker (POR) a elabora poco mas riba e topico di proyectonan cu e mandatario ta lantando actualmente cu cooperacion di diferente fondo. E mandatario a menciona e proyecto pa haya helicopter nobo pa surveillancedienst, proyecto pa cuminsa uza drone den cadena hudicial como tanto e investigacion cu e lo kier cuminsa pa asina haya sa con a para cu e placa cu a wordo poni pa drecha sistema di camaranan den cuadro di orden publico.

Sr. Bikker a splica cu den un termino di 2 siman lo por determina con lo bay financia e helicopter pa asina por combati criminalidad mas eficientemente rond di nos costanan y awanan teritorial. E fondonan cu lo por uza pa financia e helicopter sr. Bikker a splica cu lo busca manera pa financia esaki por ehempel por medio di fondo di combatimento di criminalidad of fundacionnan entre ATA y AHATA relaciona cu turismo. Alabes e mandatario a splica cu lo sigura un espacio pa e proyecto aki den e presupuesto di 2018.

Actualmente ta asina cu lo bay hiba e proposicionnan cu a wordo prepara pa parlamento. Na mes momento lo bay tene un destaho publico pa asina mira con lo por haci e proyecto aki un realidad. Di e manera aki sr. Bikker a subraya cu e ta un persona cu ta orienta riba soluciona problema. “Nos ta anunciando pasonan urgente y concreto pa restaura y sanea e situacion riba nos isla pero mas importante ta pa e pasonan aki haya follow up inmediato”.

Akinan sr. Bikker a referi na e manera con tabatin ya caba un destaho publico pa asina por yega na un helicopter nobo pa polis den 2014, ‘pero mi predecesor a neglisha e proyecto aki pues no a termina cu ne.” E mandatario a expresa cu si lo a sigui cu esaki, e siguridad di nos isla lo por a wordo optimalisa di miho manera.

Cuerpo Policial cu autoridad pa tira bista riba ilegalidad

Segun e mandatario, tin un grupo di persona cu ta drenta nos isla sea legalmente of di manera ilicito cu despues (tin di nan) ta bay over na falta respet di nos leynan. Pues lo amplia manera nos a publica den pasado e autoridad cu Cuerpo Policial tin na su disponibilidad por medio di amplia articulo 33 di ley di admision (LTU). “Hopi biaha nos ta mira cu polis ora ta para un persona na accident por ehempel ta haya sa cu e persona ta indocumenta, pues e cambio cu nos kier trece dilanti ta pa facilita y haci posibel e proceso pa yama Warda Nos Costa y ehecuta un maneho mas inclusivo entre e dos departamentonan. Y e berdad ta cu nan tabatin e autoridad aki caba.”

Ministerio a wordo haya den estado deplorabel

Sr. Bikker a pone enfasis riba e manera con su persona a haya tanto e ministerio di husticia como e ministerio di asuntonan di stranheria den un estado deplorabel. Aunke por cuestiona si e ministerio cual ta encera departamento Dimas tabata den un estado deplorabel mirando cu e departamento tabata den transicion pa upgrade nan sistemanan digital y procesonan di servicio di cliente. Sinembargo e mandatario a enfoca riba e manera con e mandatario anteriormente encarga cu infrastructura y integracion tabata bay di acuerdo cu cualkier peticion cu lo drenta cerca dje firmando ‘akkoord conform verzoek’.

Na banda di e ministerio di husticia a hereda un situacion unda hopi polis tabata demotiva y tambe tabatin falta di material, segun e mandatario. “Tin biaha e herida ta pica poco prome cu e por cura.”

Ademas e mandatario a splica cu pa via di haya situacionnan cuestionabel na diferente departamento cu ta resorta bou di su ministerio, e mandatario a haci un peticion na tur e departamento pa entrega un asina yama verlanglijst na e mandatario. Asina e ta spera di manera pragmatico pa trece un mehoracion den e departamentonan.

Opera helicopter ta pagabel’

Un colega di prensa a trece dilanti cu ta notabel cu gobierno di Aruba ta paga basta placa na kustwacht Hulandes pa asina opera helicopter pa hiba control riba nos costanan. Riba esaki e mandatario a comenta cu ya caba kustwacht tin dos helicopter na su disponibilidad. Segun e mandatario ta asina mes cu nan por controla cu basta exito riba nos costanan, incluyendo haci rescatenan riba lama. Pero e meta pa e helicopter aki ta pa trece un aspecto extra pa tene bista riba kico ta pasando riba nos tera, particularmente den area hotelero. E mandatario a splica cu di manera di bisa den Hulandes ‘de ene sluit de andere niet af’.

Riba e pregunta financiero e mandatario a splica cu recien el a haya un indicacion riba cuanto lo gobierno mester gasta pa tin e surveillance aki activo pa par di ora pa luna ‘ta hopi pagabel’. Esaki compara cu e manera con e gabinete anterior tabata paga na granel consultantnan, segun e mandatario.

Fondo di proyecto di camara ta keda un misterio

Manera nos a publica den pasado, e proyecto di camara cu a wordo financia por medio di Fondo Desaroyo Aruba (FDA) a caba na nada. Un di e cosnan cu e mandatario a haya den un situacion cuestionabel ta e mesun aparatonan ki cu tabata destina pa yuda mantene orden publico.

Nos no a haya ningun file riba e proyecto di camara. Tur cos ta wordo manda pa archivo nacional y ta wordo gebolter. Ora mi a mira esaki e ta logico cu mester bin un tipo di investigacion pa asina haya sa kico a tuma luga. Mi ta kere nos lo por cana caminda na Algemene Rekenkamer of Centrale Accountantsdienst pa yega na esaki.”

Segun e mandatario, posiblemente lo ta trata di kapitaal vernietiging den e proyecto aki. ‘Y esaki ta placa di pueblo’, e mandatario a expresa. Sr. Bikker a expresa cu ta buscando manera pa trece reestablece e proyecto aki por medio di colabora cu compania nacional Setar.