Binti studiante a comete suicidio na India siman pasa, despues cu e Board of Intermediate Education (BIE) a anuncia cijfer di nan examen, cual Khaalejtimes ta reporta a causa controversia despues cu a haya discrepancia den e resultado.
Casi 1 miyon studiante a sinta e examen entre februari y maart, y casi 350,000 no a haal e, causando protesta amplio for di mayornan, grupo di studiante, y partido politico.
Entre e studiantenan cu a perde nan bida, Sirisha a faya su examen di biologie, y a cende su mes na candela na su cas den districto di Narayanpet diasabra, despues cu su mayornan a sali, segun Khaleejtimes.
Diahuebs ultimo, chief minister K. Chandrashekhar Rao a ordena e recuento y re- verificacion pa tur studiante cu no a haal nan examen, mientras a urgi e studiantenan pa no comete suicidio, añadiendo cu faya e examen no ta nifica un fin na nan bida.
Segun mayornan, locual a causa e studiantenan pa comete suicidio tabata un eror di banda di e compania di software, Globarena Technologies Private Limited, cu a ser contrata pa Telagana BIE pa desaroya software pa procesa admision, pre- examinacion y resultadonan post- examinacion.
12 centro di BIE actualmente ta den proceso di evalua e respuesta di e studiantenan cu no a haal e examen, cada un atendiendo entre 70mil y 120mil. Ademas, 50mil studiante cu a haal e examen a aplica pa re- verificacion, pasobra nan no tabata satisfecho cu e resultado.
Sinembargo, mayornan y studiantenan a protesta pa falta di informacion y e proceso di re- verificacion. Nan kier pa re- verificacion ta gratis pa tur studiante.
E gruponan di studiante tambe a pidi como $36mil como compensacion pa e famianan di cada studiante cu a comete suicidio.
Diabierna, e National Human Rights Commission (NHRC) a manda un nota na gobierno di Telangana, solicitando un reporte detaya di e Board.
