Si nos no cuida nos ecosistemanan, mundo lo percura cu hende tampoco lo sobrevivi

Awe ta Dia Mundial di Medio ambiente y e tema cu e programa di medio ambiente di Nacionnan Uni, UNEP ta enfoca riba e aña aki ta ecosistemanan. Pero pa compronde e mensahe mester sa kico ta medio ambiente, segun mr. Jeff Sybesma, biologo, Huez administrativo y ambientalista biba na Corsou. Sybesma ta sigui e desaroyo di cuido di medio ambiente na Corsou, pero tambe den henter Reino, incluso Aruba hopi di cerca.

Kico ta un ecosistema

Un ecosistema ta un comunidad mas o menos distancia di organismo, manera mata, animal y microorganismo denter di un totalidad mas grandi y unda un intercambio interno di material y energia, pero tambe cu e ambiente no-bibo manera e superficie, awa y aire.

“Tin diferente tipo di ecosistema,” Sybesma a bisa. “Hopi biaha ta usa e mantencion di sistemanan di coral como ehempel. Den Amazonas por pensa riba vegetacion cu no ta penetrabel, unda mata, yerba tur ta un masa asina cera unda bestianan ta biba. Pero “Amazonas ta bou menasa pa motibo di un sed pa palo y tereno pa agricultura y cria di ganado. Y si no ta kap e matanan conscientemente, e candela cu ta cende pa traha luga y si sigui asina, pronto e jungla original lo desaparece.” Y cu e matanan lo nifica tambe extincion di como 600 especie di animal for di faz di mundo.

Pero rond mundo, paisnan ta perdiendo bosquenan original debi na cambio di clima y actonan humano. Na Rusia, Indonesia y Australia, e candelanan ta dos biaha mas hopi cu normal. No solamente e bosquenan ta core peliger, pero tambe e savana cu tambe ta un ecosistema importante pa animal. Banda cu e candelanan ta baha e produccion di oxigeno, nan mes ta pusha mas gas cu ta contribui na cambio di clima den atmosfera cu ta haci’e un peliger pa hende. E candelanan na California ademas di ta un desaster natural, ta menasa bida cotidiano di hende. Cada aña como 80 mil hende ta perde nan cas, nan hogar na California pa motibo di candela.

Coralnan rond islanan ABC

Sybesma a bisa cu islanan ABC ta bendiciona cu un di e sistemanan di coral mas bunita den Caribe y posiblemente den henter mundo. Aruba tin menos coral compara cu Boneiro, pero esey tin di haber cu e constitucion geologico di e fondo di lama na Aruba, cu ta mas santo. Pero e santo ta bin di coral. “Aunke cu nos ta memey di bunita coral, mi mester bisa si cu compara cu 30 aña pasa, hopi a desaparece, tanto na Corsou, Boneiro y Aruba.”

Cainan di coral tropical ta pertenece na e ecosistemanan mas diverso y productivo na mundo. Nan ta presente unicamente den tropico, y tin suficiente luz di solo ta yega na nan y e awa no ta mucho friu ni cayente. Nan ta cas pa un sin fin di sorto di pisca y otro organismo marino cu ta comparabel cu Amazonas. E cainan rond di e islanan ademas ta un contene un biodiversidad enorme cu ta carga pa coralnan di calichi, cu ta produci e skelet di e rifnan esta e cay. P’esey mes, coral ta forma un ecosistema compleho cu ta brinda un hogar na organismonan excepcional. “Miyones di hende ta depende di cainan di coral den forma di cuminda, esta pesca, proteccion di costa hunto cu e yerba di lama y mata di mangel, ademas di recreacion. Y riba e islanan ABC, e no ta diferente.”

Falta di consciencia

Mirando e balor di sistemanan di coral, e ta dificil pa Jeff Sybesma compronde con ta scoge pa pone presion enorme riba e cainan pa medio di actividadnan cu no ta bon pensa. E cambio di clima cu ta hisa temperatura di lama ta pone e organismo bou stress y riba dje na Aruba, e dump cu ta mucho yen ta bashando den lama y ta mata e coral y e mangelnan. E ta bisto den e asina yama ‘bleaching’ di e coral, unda nan ta bira blanco. Si e proceso dura mucho largo, e coral ta muri. “Pero na Aruba, banda di dump, construccion descontrola di hotel y sushedad for di tera ta pone presion enorme riba e coralnan.”

Populacion

Motibo di e crecemento exponencial di atake contra ecosistemanan rond mundo ta un populacion mundial cu a crece hopi. Pero esaki no ta e caso riba islanan ABC. E crecemento ta debi na turismo y door di atrae labor di afo cu ta mas barata. “Si ta keda pensa riba turismo pa desaroyo economico, lo tin consecuencia no solamente pa e pais y su habitantenan , pero tambe e ecosistemanan cu ta sufri cu na turno ta bolbe afecta e populacion,” Sybesma a adverti.

Mundo ta bibo y lo keda bibo: hende no

Consecuentemente, e kier enfatisa e teoria di Gaia, desaroya pa James Lovelock. Gaia ta e Dios Griego cu ta representa mundo. Segun e teoria Gaia, tin un interaccion continuo entre tur ser bibo y no-bibo riba mundo, manera aire, awa y tera. Hunto nan ta percura pa un compleho cu ta autoregula su mes, cu ta percura cu e condicion di bida riba mundo ta keda intacto. Pues, mundo ta un ser bibo unda tur organismo ta forma un parti di dje. “E ta similar cu un curpa humano cu ta consisti di organonan, su skelet y nervionan, entre otro. Pero teoreticamente, cada elemento di e totalidad, bou circunstancia ideal, lo por biba riba nan mes. E punto ta cu e teoria di Gaia ta bisa cu e interaccion entre e mundo cu ta bibo y e organismonan ta percura pa un balans pa motibo di un mecanismo biologico. Consecuencia ta cu un sistema cu ta autoregula su mes unda organismonan cu ta mehora nan condicion di biba tin mas oportunidad pa sobrevivi, compara cu esnan cu ta destrui. Den otro palabra, hende cu ta afecta mundo, ta percura cu e mes ta desaparece. E balans di e organismo bibo di mundo ta recupera despues y ta sigui sin hende. Como tal, e ta den nos propio man pa evita cu mundo ta sanea su mes di nos. Unicamente si nos proteha e ecosistemanan di mundo, di cual nos ta forma parti di dje, nos lo por sigui existi,” Jeff Sybesma a conclui.