Aruba ta bay urna electoral dia 25 di juni, pa eleccion cu ta tuma lugar un par di luna mas prome cu mester tabata. Pueblo di Aruba ta para dilanti un decision crucial; e eleccion aki lo ta uno di esunnan mas importante pa pais Aruba, y dicon? Nunca antes Aruba tabata den un situacion di pandemia mundial, nunca antes asina hopi hende a perde trabao, a perde negoshi y hasta a perde e bataya, den e pandemia mundial di Covid-19. Gobierno na mando a hay’e cu retonan nunca antes visto. Decisionnan hopi grandi y dificil mester a wordo tuma cu politicamente ta impopular pero cu mester a wordo tuma na bienestar general di e cuidadano y pais den su totalidad.

Na e eleccion aki lo tin un total di 12 partido politico ta participa. Loke ta importante ta kico e pais mester na e momentonan aki; tin ora mester para keto y pensa bon cu no ta semper ta loke bo kier sino kico ta importante y necesario. Loke ta esencial ta pa pueblo vota consciente, e pais mester un gobierno stabil cu por sigui guia e pais den bon forma. Esey no kiermeen un gobierno di un partido so, pero si un gobierno cu por sigui cu un continuacion di maneho y cu tin experiencia caba vooral den e situacion actual. No por hunga politica cu emocion ni sentimento di pueblo, pero mester ta critico y realistico pa por sigui e maneho y pa no tin cambio descabeya. No por bin cu promesanan falso o ilogico den e momento nan aki cu no tin pia ni cabez.

Promesa pa habri refineria, baha belasting, tin gobernantenan ta papia boca yen pa hisa salario back na 100%, esakinan ta kere y spera cu pueblo lo guli e pilder aki? Gobierno no por dicidi pa e comerciante, e dunador di trabao. E gobernante mester percura pa economia subi back na 140% pa asina e comerciante por paga su empleadonan 100%. Pasobra no tin placa y economia ta stanca. Nos por cuantifica nos problema nan, cual ta lo sigiuente: FASE, ayudo pa esnan cu tin negoshi chiquito, loonsubsidie; extra backup cuido, dokternan, remedinan, percura pa hospital no collapse, etc. Pesey tur esnan cu tin derecho di voto mester reflexiona, pensa bon y vota consciente pa bienestar di henter e pais. Un cambio den maneho lo no ta ideal mirando e situacion mundial cu nos ta aden awor. Tambe mester ta consciente di e realidad di e sucedidonan rond di politiconan cu ta activo den eleccion venidero.

Aruba mester hende responsable y confiable, hende cu por sigui guia e pais pa lo mas pronto nos por ta back riba pia y lanta nos economia back, bin cu cuponan di trabao pa nos hendenan, sigura nos pueblo su bienestar atrobe. Dia 25 di juni venidero lo marca historia pa hunto e pueblo cu derecho di voto haci bon oportunidad pa salba Aruba y e futuro generacionnan.

No ta e Politico, e Ambtenaar ta nos problema!

Sigur e ultimo añanan nos ta scucha mas y mas persona den nos comunidad ta culpa politiconan pa tur e problemanan den nos sociedad. Seguramente, no ta kita afor cu nan ta hunga un rol importante den hopi di loke ta pasa riba nos isla. Sin embargo, mester enfoca primordialmente riba e grupo cu casi nunca ta menciona pa e malaise den nos sociedad, e ambtenaar.

Hopi ta e iregularidadnan cu nos ta scucha, experiencia y hasta frustracion. Pero, cada bez atrobe e “target” mas facil ta punta dede riba e politico. Nos ta realisa cu e politico hamas lo por funciona sin e cooperacion di e aparato gubernamental cu si ta gosa di continuidad? Cada cuatro aña pueblo ta scohe e partido politico(nan), y ta confia cu nan lo ta ehecuta e plan presenta pa nan. Pero, cada cuatro aña hopi hende ta desapunta cu e logronan di e gobierno cu nan a scohe. Manera bisa caba, e politico no lo por ehecuta, pone su plan nan den accion sin e ambtenaar. Cuanto biaha acercando un departamento publico, nos ta experiencia trahadornan sin mucho gana di duna servicio? Na balie, servicio ta menos bon, emailnan nunca ta haya contesta, cartanan mescos, y hasta sentencia di Huez no ta respeta.

Un departamento asina ta DIP. Gobierno ta bin y gobierno ta bai. Director ta wordo poni y kita, pero e servicio ta keda mescos. Persona cu tin 10 aña of mas ta warda pa un tereno y nunca no ta keda cla, mientras tanto otronan ta keda cla den algun dia, of siman.  Agricultornan ta sclama pa atencion den e situacion di huurgrond, pero simplemente ta pone nan un banda y cada bez tin un version nobo pakico nan papelnan no a keda cla. Mientras tanto, algun tin e luho di tin huurgrond pa ‘casa de campo’, y no pa loke e ta destina realmente: produci cuminda localmente pa yuda baha dependencia riba importacion.

Otro departamento asina ta DIMAS. Ta cuanto persona ta sclama di e proceso y forma con ta trata peticion sin cu ta bin mehoracion? Ta hopi a inverti den digitalisacion pa facilita e proceso, sin embargo hopi ta e critica cu procesonan no ta cana manera mester ta, y e trato y transparencia ta depende hopi di esun cu ta duna servicio na e momento ey. “It takes two to Tango”. E empleado publico ta un di nan. Esun cu den e tango aki tey pa 10, 20, 30, aña.

Nos mester puntra nos mes e ora, ta ken di berdad tin nos pais, economia, y bienestar general stanca? E politico cu nos ta cambia cada 4 of 8 aña? Of e empleado publico cu tin 10, 20,30 aña riba e puesto?

 

 

LEAVE A REPLY

Please enter your comment!
Please enter your name here