Biblioteca Nacional Aruba a presenta e Festival di Buki pa Mucha 2021. E aña aki e festival tin como tema “Bira loke bo kier” y en conexion cu e tema aki tambe, Sra. Astrid Britten, directora di Biblioteca Nacional Aruba, a presenta e regalo di e festival di buki, cual ta un buki titula “Bira loke bo kier! Storia y poema inspirativo pa e muchanan di Aruba”.

Sra. Britten a splica cu e e buki “Bira loke bo kier” ta un colaboracion di diferente autor- y ilustradornan di Aruba, Corsou y Hulanda. E buki ta dedica na Nathalie Abigail Croes cu pa hopi aña tabata encarga cu e apertura di e Festival di Buki pa Mucha.

E meta principal di e Festival di Buki pa Mucha ta pa promociona lesamento entre e mucha- y hobennan. “Nos ta keda kere den esey y nos ta inculca den e muchanan e amor y e pasion cu nan por tin pa cu lesamento”, Sra. Britten a bisa.

E apertura di e di 29 Festival di Buki pa Mucha lo ta diabierna 5 di november. Sra. Zetsia Ponson, encarga cu e apertura di e festival, a splica cu e aña aki e apertura ta den manera mas innovativo, e apertura lo ta virtual. E apertura lo wordo transmiti na Telearuba dia 5 di november pa 7or di anochi, y Sra. Ponson a sigura cu e apertura lo ta yen di color, baile, musica, entretenimento y tambe contamento di storia pa e muchanan.

Lo tin tambe palabranan di bon bini di parti di Minister President Sra. Evelyn Wever Croes y tambe Minister di Enseñansa y Deporte Sr. Endy Croes.

E siman di Festival di Buki pa Mucha lo ta di 8 pa 12 di november. Durante e dianan aki lo tin actividadnan di atardi, cual ta encera presentacion di autornan cu tambe lo wordo transmiti virtualmente.

Tambe lo tin un exposicion den siman na Biblioteca Nacional, Sr. Valerie Figaroa ta encarga cu e exposicion di e festival y el a splica cu den e exposicion tin diferente backgrounds cu ta basa ariba e diferente profesionnan cu tin cu por inspira y yuda e muchanan scoge nan futuro profesion. Den e exposicion tin informacion tambe di e diferente autornan invita e aña aki pa e festival. Tin diferente presentacionnan tambe di profesionalnan di Aruba, cu ta pasa ariba e televisionnan na Biblioteca Nacional, cu ta duna informacion di kico ta e trabou cu nan ta haci.

E Festival di Buki pa Mucha tambe tin su cancion oficial, Sra. Ruth Gaarie, representante di Pitbull Singing Productions y encarga cu cancion di e festival a duna mas informacion ariba e cantica. “Pa nos ta mas cu un placer pa e aña aki wordo acerca pa Biblioteca Nacional pa ta encarga cu e tema oficial pa e festival di buki di e aña aki”, el a bisa.

El a splica cu e cancion ta titula ‘Bo Pasion’, composita pa Stephanie Gravenhorst y aregla pa Hubert Thiel. Pitbull Singing Production Kids tambe ta bay presenta e cancion e dia di e apertura di e festival. El a sigui splica cu e ritmo di e cancion ta un disco-pop, un ritmo alegre, y e cancion ta papia di e hobbienan cu den futuro por wordo usa como un profesion. “E cancion ta pa incentiva e muchanan pa usa tambe e parti di arte como un profesion pa e dia di mañan”, el a bisa.

Pa e clausura di e festival e aña aki Biblioteca Nacional lo haci un competencia ariba social media. Na momento cu pasa bishita e exposicion, e mucha por saca potret cu e diferente backgroundnan cu tin, subi e potret ariba Facebook y Instagram, usa #FestivaldiBukipaMucha2021 of #BibliotecaNacionalAruba y asina e mucha lo por participa pa gana un bunita premio. Ultimo dia pa participa lo ta 11 di november y e ganadornan lo wordo saca dia 12 di november.

LEAVE A REPLY

Please enter your comment!
Please enter your name here