Bolivianonan lo acudi atrobe pa vota pa un presidente, vice-presidente nobo y renoba e Asamblea e ‘prome diadomingo di mei’, despues di anulacion di e eleccionnan di october memey di acusacionnan di fraude electoral na fabor di e presidente na e momentonan ey, Evo Morales.
E calendario electoral lo keda conoci awe 6 di januari, pero a keda estableci un segunda buelta, si ta necesario, cu lo tuma luga ‘den un plaso no mayor cu 45 dia despues di celebra e prome buelta’, presidente di e Tribunal Salvador Romero a informa.
E partido di e ex-presidente Evo Morales, Movimiento al Socialismo (MAS) lo enfrenta pa prome biaha un eleccion sin e lider indigena como candidato.
Morales a convoca na december un reunion di su partido na Argentina, na unda e ta procesa su refugio, pa eligi un representante. Sinembargo, algun politico so di MAS a acudi pa e cita.
Na final di e encuentro, celebra na Buenos Aires, Morales a anuncia cu MAS lo reuni dia 19 di januari pa eligi su candidato pa presidencia.
Evo Morales a ser eligi presidente na october pa su cuater mandato consecutivo, pero despues di e denuncia di fraude y protestanan den su contra, el a renuncia y denuncia un golpi di Estado den su contra, despues cu Ehercito a retira su apoyo.
Na e momentonan aki, e mando di e pais ta den man di e presidente interino Jeanine Áñez, ken a asumi e funcion despues di varios renuncia di funcionarionan den e linea di sucesion cu tabata apoya Morales.
