Entidad Publico Boneiro y Tourism Corporation Bonaire (TCB) a yama Royal Caribbean Group bon biní na Boneiro. Esaki a tuma luga na bispo di inicio di un colaboracion strategico nobo entre nos isla y e compania crucero. Melissa Morales, hefe di desaroyo di destinacion pa Noord America y Sur Amerika y area Caribense pa Royal Caribbean Group, y diputado Hennyson Thielman a firma un Memorandum of Understanding (MOU). Ambos partner ta desea explora posibilidad nan conhunto y mehora experencia di pasaheronan crucero na Boneiro, di manera pa aumenta nan consumo y gasto ora nan ta na Boneiro. Diputado Thielman a bisa cu e MOU aki ta sirbi pa trece turismo mas cerca habitantenan di Boneiro.
‘Hunto cu TCB nos a hinca un programa den otro pa Royal Caribbean Group, pa asina nan por a explora nos isla y mira kico Boneiro tin di ofrece su bishitantenan. Tambe nos a explora posibilidatnan interesante cu lo por brinda nos beneficio mutuo,’ segun diputado Thielman. E dia a cuminsa cu un paseo na parti zuid di nos isla cu un stop cortico na e casnan di catibo, na beach di Atlantis y di Sorobon. Despues e recorido a sigui pa Rincon via Karpata y Gotomeer y e team a haya un prome impresion di e rikesa cultural di nos isla y nan por a gosa di nos dushi cumindanan local durante un lunch na Mangazina di Rei.
Nos kier enfatisa cu preservacion di naturalesa y nos patrimonio cultural ta partinan integral di nos producto turistico y desaroyo sostenibel di Boneiro,’ segun diputado Thielman. Nan a firma e MOU riba waf den haf di Playa cu Mariner of the Seas di Royal Caribbean den background.
Melissa Morales, representante di Royal Caribbean Group, ta satisfecho tocante e bishita y ta anhela un colaboracion hopi fructifero cu Boneiro. ‘Nos ta ansioso pa fortifica nos laso di colaboracion. Nos ta bay traha riba diversificacion di e excursionnan i riba desaroyo di producto y nos ta spera di contribui na educacion. Nos ta bay investiga experencia di e turistanan y nos ta bay crea programa pa trece e mensahe di Bonaire Bond bou di atencion.’ E Bonaire Bond ta un promesa di destinacion cu a keda diseña pa invita nos bishitantenan pa firma un promesa pa biaha na un manera responsabel y pa respeta nos isla cu como meta pa preserva e forsa natural di atraccion di Boneiro durante e añanan binidero.
