Director di ‘Parasite’, Bong Joon Ho a ser selecta como presidente di hurado pa e di 78 Festival Internacional di Pelicula di Venecia, e organisadonan a bisa ayera. E ganado di Oscar lo presidi riba shete hurado pa entrega e premionan mayor di e festival, incluyendo e prestigioso Leon di Oro. E lo ta e prome Sur Koreano pa tuma e posicion.
Den un declaracion, e director a bisa cu e ta ‘honra di ta involucra den e tradicion cinematico bunita aki. Como presidente di e hurado – y mas importante un cinefilo perpetuo – mi ta cla pa admira y aplaudi tur e tremendo peliculanan selecta pa e festival. Mi ta yen di emocion y speransa genuino’.
Director di e festival, Alberto Barbera a remarca tocante e naturalesa historico di e seleccion. “Nos ta inmensamente gradici na dje pa acepta di pone su pasion como un cinefilo atento, inkisitivo y sin prehuicio na servicio di nos festival”, Barbera a bisa. “E decision pa confia e hurado na un cineasta Koreano, pa prome biaha den historia di e festival, tambe ta confirmacion cu e evento Veneciano ta inclui cinema di henter mundo, y cu directornan di tur pais sa cu nan por considera Venecia nan segundo cas.”
E Festival di Pelicula di Venecia tabata un di e unico festivalnan di pelicula mayor cu a tuma luga presencialmente aña pasa memey di e pandemia. E di 78 edicion ta programa pa core entre dianan 1 – 11 di september proximo.
