Parlamentario André Bosman (VVD) kier amplia e investigacion di Algemene Rekenkamer riba con ta gasta e placa cu Den Haag ta manda Caribe Hulandes (BES) pa subsidia agricultura.
E decision pa cuminsa e investigacion tabata un iniciativa di Tweede Kamer su comision riba relacionnan di Reino. E comision tabatin su dudanan cu e subsidio destina pa desaroya maneho di agricultura riba Boneiro lo a bay den e mannan corecto. Bosman a pidi e comision pa amplia e investigacion.
“Amplia e investigacion aki tin su balor pa asina haya sa si e organonan publico di Caribe Hulandes ta uzando e subsidio special conforme ley y conforme e proposito pa cual nan ta wordo duna, bou cual ta cay entre otro e subsidio cu ta duna pa desaroya e maneho di agricultura.”
Bosman a entrega su proposicion na su coleganan den e comision, cual lo trata esaki proximo siman den un reunion. E chens cu nan lo nenga Bosman su peticion ta chikito.
