Ayera 18 di juni agentenan di Guardia Nacional a inicia cu e operacionnan na e frontera sur di e pais pa intensifica e esfuerso di frena e fluho di migracion pa Merca y cumpli cu e demanda di Trump.
Guardia Nacional, e curpa di siguridad nobo consistiendo di polis federal, militarnan y marinier di e gobierno di Andrés Manuel López Obrador mester drenta den funcion oficial 30 di juni venidero, pero e presion economico cu Merca a eherce a acelera su presencia den e frontera sur di e pais, ora ayera e gobierno lo termina di desplega 6.000 agente.
Aunke e 16 di juni pasa e curpa di siguridad a reforsa distinto control na teritorio fronteriso, e minister di relacionnan exterior, Marcelo Ebrard, a anuncia den un conferencia di prensa cu ‘e despliegue di Guardia Nacional lo completa e siman aki cu e apoyo di ministerio di defensa y marina’.
Segun autoridadnan di Mexico, tambe e medida ta contesta e boluntad di detene esunnan cu ta fomenta e trafico di persona paden di Mexico, ora e mercado di contrabanda mas grandi di mundo tin luga, algo cu segun Ebrard ‘no lo tolera’.
E palabranan di e ministerio a yega dianan pasa despues cu autoridadnan Mexicano a haya na estado oriental di Veracruz 785 migrante, hopi di nan menor di edad, paden di container di transporte cu destino pa e frontera cu Merca.
