VVD ta cansa cu Aruba, Corsou y Sint Maarten. Segun André Bosman, Hulanda constantemente ta esun cu ta yama ora mester resolve problema. E parlamentario kier pa Hulanda sali di e relacion como Reino cu e paisnan Caribense.
E proposicion a crea un debate fuerte. D66 ta tilda Bosman (VVD) di comporta di manera ‘colonial’. Miembro di fraccion di CDA Chris van Dam ta Sali di sala rabia pa via cu ta yama e islanan ‘adictonan na alcohol’. Esaki pa via di e comparacion cu Bosman a haci, bisando cu Hulanda en final no ta yuda e islanan para riba nan mesun pia si cada biaha cu algo bay fout ta yora cerca mama Hulanda.
Segun Bosman, traha acuerdonan ‘no tin mas sentido’, pasobra e gobernantenan Caribense nunca ta wanta nan mes na e palabracionnan. Segun partido di coalicion CDA y partido di oposicion GroenLinks, VVD ta laga e habitantenan di e 3 islanan autonomo na caya. E partidonan aki na contrario di VVD ta mira cu tin desaroyo positivo riba e islanan, particularmente bou e ‘generacion nobo’.
Sigui yuda e islanan segun VVD ta un ‘pensamento colonial’. Un otro momento notabel tabata ora e partnernan den coalicion di partidonan VVD y D66 a clash cu otro. Segun parlamentario Antje Diertens (D66) ta Bosman ta esun cu ta ‘colonial’, por medio di kier dicidi con e relacion entre Hulanda y e islanan lo mester ta. Tanto partidonan D66, CDA, como GroenLinks ta haya e storia di VVD ‘biña bieu den saco nobo’.
Na nan turno, VVD y SP kier skirbi e Statuut di nobo, cu palabracionnan concreto riba ken ta haci kico y cua responsabilidad ta cay bou ken. Hulanda ta depende den e caso aki riba e colaboracion di e islanan. Raymond Knops a priminti cu e lo bay traha hunto cu e islanan riba revision di Statuut. Bosman di su banda a duna di conoce cu e ta duda cu e islanan lo bay colabora riba dje cu esaki.
