Ehercito di Corsou y Aruba ta intercambia luga di train

E ultimo siman y mey e mariniers di e scuadron di raiding number 32 di Aruba y e militarnan di forsa di tera di e Compagnie in de West (CIDW) di Corsou a intercambia luga di entrena. Militarnan di Aruba a bay train na Corsou y esunnan di Corsou a bay train na Aruba.

Mariniers di Aruba ta custumbra cu e luga di entrenamento cerca di Vader Piet, mientras cu pa nan e tereno di tiramento riba Wacawa na Corsou lo ta un ambiente completamente nobo. Esaki ta conta tambe pa e forsa di CIDW na Corsou, nan ta train na Corsou primordialmente. Sinembargo CIDW ta custumbra cu haci rotacion di e luga di training, por ehempel cada 4 luna nan sa bishita Aruba como parti di nan programa di training regular. E transportacion di e militarnan y e material a tuma luga por medio di e nave Zr. Ms. Pelikaan.