E dos proyecto di boutique hotel na Sero Colorado ta bay ta den e edificio unda antes tabata Nanki Country Club (ex Esso Club) y banda di Secrets, cu ta riba e baranca grandi cu bista riba Baby Beach. Esaki ta informacion cu Bon Dia Aruba a haya di Director di DIP, dr. Haime Croes.

Ta trata di dos proyecto cu ta den e fase inicial y cu no por duna mucho informacion pasobra falta hopi detaye ainda pa finalisa. Pero segun dr. Croes, ta trata aki di dos proyecto di 30 camber cada uno, y no 40 manera cu Minister di Turismo a anuncia den Parlamento.

Manera ta conoci Minister di Turismo Dangui Oduber a anuncia durante un reunion informativo di Parlamento, aña aki ainda lo amplia Baby Beach, y sigui crea mas infrastructura, percura pa landscaping, restaurant y baño publico. E proyectonan aki ta forma parti di e plannan di Gobierno pa brinda mas perspectiva na San Nicolas.

E Minister a papia di un ampliacion fisico di e beach pero a informa Parlamento cu mester a para e proyecto pa motibo di COVID-19. Sinembargo e proyecto lo sigui e aña aki y pa fin di Augustus, fase uno y fase dos di e proyecto grandi di Baby Beach lo ta cla, cu ta inclui mas parkeo.

Banda di Baby Beach, na Rodger’s Beach lo traha e pier nobo, tambe mehora parkeo y crea amenidadnan nobo, incluso restaurant y baño publico.

Tur ta proyectonan, segun Minister Oduber, cu ta necesario pa hisa calidad di e area wardando pa e hotel Secrets cu mester ta cla aki dos aña. E Minister a papia tambe di dos proyecto di boutique hotels, di no mas di 40 camber cada uno cu Gobierno ta contemplando pa e area.

Vocero di Minister Oduber a informa Bon Dia Aruba cu e intencion ta pa amplia e beach. Lo yega e area cu ta conoci como Lone Palm Stadium cu santo blanco, pa di e forma aki e area di beach bira mas grandi. Esaki ta pa tene cuenta cu e desaroyo di hotel cu ta andando.

E dos proyecto di boutique hotel ta di nivel halto y segun e vocero, lo eleva e calidad di turismo, conforme maneho di Aruba.

Director di DIP Haime Croes di su banda a informa cu e Plan di Ordenanza Teritorial, ROP ta permiti un total di 680 camber di hotel na e area di Sero Colorado y Baby Beach pa e proximo cinco añanan y pa tal motibo mes, cu un Secrets di 600 camber, e dos proyectonan di boutique hotels no por ta mas cu 40 camber. Croes mes ta kere cu awor mester presenta plannan concreto pa mira con realistico dos proyecto asina lo ta, como tal a prefera di no menciona ken ta e desaroyadornan.