Jess Wolff ta un artista cu un punto di bista y estilo unico y diferente. Un persona cu a lanta na Savaneta disfrutando di un criansa crioyo, cu a studia den exterior pa un formacion artistico cosmopolitano, awo ta conta Bon Dia Aruba tocante su experiencia cu identidad Arubiano, y e influencia di arte riba nos cultura.

Kico dia 18 di maart ta nifica pa bo, y con bo ta celebra esaki?
 “Esaki ta un pregunta cu a pone mi para keto y pensa.

Mi no a lanta na cas cu e custumber di celebra Himno y Bandera, pues na scol tampoco mi tabata participa den ningun celebracion (pa motibo di Religion e tempo ey).

Despues como studiante na Hulanda, mi a celebra Aruba dag algun biaha.

Desde cu mi a bin biba back na Aruba, mi por corda di un biaha cu mi mama y mi famia a organisa un evento di 18 di maart pa bario di Yaraweg. Otro biahanan mi a bay wak algun actividad rond di e isla, of djis keda cas y wak loke ta transmiti riba television.

Mi no ta sinti cu e celebracion aki no tin raiz profundo den mi, pero mi ta disfruta e compartimento di nos historia y pasado y eventonan.”

Den Jess su arte por nota un influencia grandi di patronchinan di naturalesa Arubiano, como tambe uso di materialnan local. Entre esaki por destaca dibuhonan di cocolishi of joyas traha cu piedranan local.

Nos a puntra Jess, con e ser Arubiano ta influencia bo arte?

“E ser Arubiano ta un parti grandi di mi ambiente cu mi a crece aden, y bo ambiente tin hopi influencia riba con bo lo forma den bida inconscientemente. Y esaki kiermen bo manera di expresa tambe.

Parti di mi famia cu mi a crece hopi cerca dje ta Arubiano cu tin hopi influencia artistico den nos cultura. Pero nos ta bin di un isla chikito cu ta keda cu su limitacionnan.

Na comienso y pa hopi tempo mi tabatin dificultad pa mustra mi arte door di mi inseguridad (aunke esey nunca a stop mi).

Den mi punto di bista, e ser Arubiano ta hopi caluroso, expresivo y pasiona. Pero tambe hopi distancia di su ‘core self’, ta carga hopi problema emocional y trauma di pasado. Nos eigeinlijk tin un ciclo toxico pa kibra. Y esaki ta unda mi ta bezig explorando den mi proyectonan actual.

Temanan relaciona cu trauma y salud mental, compasion, tempo y espacio, conecta cu nos mes via e naturalesa, y consciencia colectivo.

Mi ta haya hopi interesante pa realisa cu nos ta un isla cu a wordo colonisa y ki efecto esaki tin riba nos awe.”

E vision artistico ta alabes un reflexion di e universo interior di e artista y tambe di e sociedad cu a duna bida na e artista. Esaki a keda evidente den e forma con Jess ta usa su arte pa expresa tanto su emocionnan interior como e zeitgeist di Aruba.

Con importante e rol di artista ta pa nos cultura?

E rol di un artista ta sumamente importante. Y ta cu nos arte nos ta comunica y conecta riba un nivel mas profundo den bida. Nos ta siña comparti nos idea y soñonan, nos pensamentonan, nos punto di bista y nos visionnan.

Si nos duna mas balor y atencion na nos arte y cultura, nos isla por crece y bay dilanti den hopi manera mas saludabel. Nos trabao como artista contemporaneo ta pa crea e wowo y voz di nos comunidad, via obra di arte.”