Brasil: Colombia y Brasil ta uni esfuerso pa atende refugiado Venezolano

(ElNacional) – Brasil y Colombia a anuncia diaranson pasa cu nan lo fortifica e cooperacion na frontera y e intercambio di informacion encuanto e situacion di e Venezolanonan cu ta yega na ambos pais. E delegacion Colombiano cu a asisti na Brasilia pa un reunion tabata integra pa Maria Angela Holguin, ministro di Relacion Exterior y pa Luis Carlos Colina, ministro di Defensa.

Aloysio Nunes, canciyer di Brasil, tabata acompaña pa e ministronan di Presidencia, Husticia y Defensa. Nunes a bisa cu Brasil tin un “excelente cooperacion na frontera” cu Colombia y cu debi na e inmigracion forsa di Venezolano, ta necesario reforsa e relacion ey.

Holguin asigura cu e principal obhetivo di e cooperacion ta pa mehora e atencion na e Venezolanonan cu ta emigrando den un situacion dificil di hamber y escasez.

Gobierno di Brasil a anuncia tambe cu dentro di 15 dia lo cuminsa cu e transferencia di migrante Venezolano cu ta den condicion pa traha,  di estado Roraima pa varios estado den  interior. Siguiendo criterio di calificacion profesional y interes laboral,  a selecciona 350 migrante pa bay traha na estado di Sao Paulo,  y otro 180 mas lo bay Amazonas, den region Norte.

Segun funcionarionan di gobierno di Brasil, tin tres tipo di migrante: esunnan cu ta bin en busca di cuminda o medicamento o tratamento medico; esunnan cu a bin pa keda den e region mes, specialmente famianan indigena; y esunnan cu ta desea di move pa e ciudadnan grandi unda nan por traha.

E fluho migratorio na Roraima a asalta e capacidad di absorbe hende. E estado tin un poblacion di 330.000 habitante solamente y mester atende mas di 40.000 inmigrante Venezolano.

Caminda secundario blokea
Autoridadnan Colombiano a blokea 17 caminda iregular cu e meta di evita e paso di Venezolano cu ta trata di yega Colombia, cu ta encera tambe e prohibicion di pasa cu vehiculo. Maria Angela Holguin, canciyer di Colombia, a declara cu lo tin mas presencia di militar pa acompaña esaki. Mientras tanto, e puntonan di crusa frontera legalmente ta sigui funciona normalmente.

Presidente Juan Manuel Santos a solicita ayudo na comunidad internacional pa apoya e Venezolanonan cu ta huy di e crisis politico y economico na nan pais.