Husticia Brasileño a bolbe considera cu ex-presidente di Brasil, Lula da Silva, ta culpabel di corupcion y labamento di placa. Mientras tanto, e politico ta sigui defende su inocencia y su boluntad di sigui den politica.

Ayera el a ser condena den segunda instancia pa 17 aña, un luna y 10 dia di prizon pa corupcion y labamento di placa. E tres hues di Tribunal Regional Federal di region 4 (TRF-4) a duna veredicto unanime cu Lula ta culpabel di e delitonan acusa y a aumenta su condena pa 5 aña mas pa e caso conoci como ‘finca di Atibaia’.

Ta trata di un proceso cu vinculo cu Operacion Lava Jato, den cual Lula ta acusa di beneficia su mes di obranan di mehoracion di un finca na Sao Paulo, cu e tabata frecuenta hunto su famia. Segun e fiscalia, varios empresa di construccion, cu a haya beneficionan danki na e red di corupcion descubri pa Operacion Lava Jato, a destina alrededor di un miyon real, ekivalente na 234.000 dollar, pa restructura e finca cu e fin di agrada e ex-mandatario.

E novedad ta cu Lula no lo mester bolbe prizon y por warda e sentencia den libertad, ya cu e Tribunal Supremo Federal a dicidi recientemente pa prohibi prizon despues di condena di segunda instancia. Segun e doctrina huridico cu ta na vigor actualmente y basa riba presunto inocencia, e acusadonan lo bay prizon ora a agota tur e recurso den instancianan superior.

Mester recorda cu e presidente mas popular di Brasil ta acusa den otro shete huicio, di corupcion y trafico di influencia, entre otro delito. E proceso mediatico ta involucra e Instituto Lula den un skema di corupcion y ta acusa e ex-presidente di un mediacion fraudulento entre Gobierno di Guinea Ecuatorial y empresa Brasileño ARG.

 

 

LEAVE A REPLY

Please enter your comment!
Please enter your name here