E empresario y ex-presidente di e empresa Brasileño, Marcelo Odebrecht, a afirma cu Lula Da Silva a pidi su compania pa arma un proyecto di infrastructura na Cuba pa “motibo ideologico”.

Den un entrevista cu e corant Folha de Sao Paulo publica ayera, e contratista a declara cu gobierno e tempo ey a mustra un esfuerso grandi pa busca financiamento pa e obra di expansion di haf di Mariel, e haf di container moderno cu Cuba a realisa poco aña pasa, mas cu pa otro proyecto den exterior.

Papiando na su cas, unda e ta cumpliendo su sentencia di encarcelamento domiciliario, Odebrecht a conta con gobierno di Lula a bisa pa e empresa tuma na cuenta e apoyo nacional pa haci un proyecto di infrastructura na Brasil. El a declara cu den 20 aña di actividad el a mira un biaha so “un iniciativa di gobierno Brasileño cu, a pesar di e logica economico su tras, tabatin un motivacion ideologico y geopolitico, cu tabata Cuba.”

Marcelo Odebrecht tabata presidente di e empresa di construccion entre 2008 y 2015, funda pa su famia. Na december 2016 el a keda sentencia na 19 aña y cuatro luna di prison despues di e investigacion conoci como operacion ‘Lava Jato’ cu a involucra su nomber den un serie di soborno riba practicamente henter continente. Como parti di un acuerdo di cooperacion cu husticia, desde december 2017, Odebrecht ta cumpli prison na cas.

El a testifica cu Partido di Trahador (PT)., partido di Lula da Silva, tabata particularmente interesa den busca financiamento pa cualkier proyecto cu lo a construi “algo” na e isla Caribense. E pais tabata kier vivienda, pero despues a bin e idea di un haf di container cu por a genera hopi mas economia. Asina e proyecto di e haf di Mariel a nace, cu apoyo di Banco Nacional di Desaroyo Economico y Social (BNDES) di Brasil y gobierno di Lula.

 

LEAVE A REPLY

Please enter your comment!
Please enter your name here