Eliseu dos Santos ta sinti tristo y na mesun momento orguyoso: preso pa dies aña caba, awor ta integra un brigada di boluntarionan cu ta combati candela y ta realisa otro trabounan esencial pa reduci e efectonan di un candela cu ta destrui e Pantanal Brasileño.
“Nos a bin pa colabora cu tur tipo di trabou: nos a haci un curso cu cuerpo di bombero pa yuda combati e candela, den rescate di animalnan, pa hiba nan awa y cuminda”, el a splica.
E labor ta desaroya den e parti di Transpantaneira, un caminda di tera di 150 km, caretera principal di e region, cu ta bay di Porto Jofre te Pocone, na estado di Mato Grosso.
“Ta falta awa, cuminda, hopi bestia ta muri. Mi ta contento di por yuda, pero mi ta tristo di mira cu mi wowonan kico ta pasando”, Dos Santos a afirma mientras ta corta y clasifica e frutanan cu lo laga na algun puntonan determina, pa disposicion di bestianan menasa pa hamber y deshidratacion.
Igual cu otro dies preso cu ta integra e programa di sistema penitenciario di Mato Grosso, e homber aki di 54 aña, ta participa di manera boluntario.
Nan a wordo scogi pa motibo cu nan ta den fase ultimo di cumplimento di su castigo y tambe pa via cu un ehemplar comportacion.
Ekipo di AFP a compaña un parti di e grupo cu tabata auxilia e bomberonan pa habri un pida di tereno y evita cu e candela lo expande pa otro camindanan denomina ‘gang cortafuego’, den e lucha pa salba e zona mayor cu mas awa dushi di e planeta, cu ta extende te Bolivia y Paraguay.
Segun datonan oficial, desde januari te fin di augustus e candelanan a consumi 18.646 kilometer cuadra, 12.4% di e bioma di banda Brasileño. E fenomeno den gran parti a wordo provoca pa candelanan cu a sali for di control, den memey di un secura di 47 aña den e region.
E detenidonan ta basha awa, controla e candelanan y auxilia e bomberonan den tur nan tarea. Su pasonan ta vigila pa un grupo di polis y tambe cu un dispositivo electronico cu nan tin na su pia.
